റിയാദ്: കരിയറിൽ 850 ഗോൾ തികയ്ക്കുന്ന ആദ്യ ഫുട്ബോളർ എന്ന ചരിത്ര നേട്ടത്തിൽ പോർച്ചുഗൽ ഇതിഹാസം ക്രിസ്റ്റ്യാനോ റൊണാൾഡോ.
സൗദി പ്രൊ ലീഗിൽ അൽ നസർ എഫ്സിക്കുവേണ്ടി ഗോൾ നേടിയതോടെയാണ് ക്രിസ്റ്റ്യാനോ റൊണാൾഡോ 850 എന്ന മാജിക് സംഖ്യയിൽ എത്തിയത്. ക്ലബ് തലത്തിലും രാജ്യാന്തര വേദിയിലുമായാണ് റൊണാൾഡോയുടെ 850 ഗോൾ നേട്ടം.
അൽ ഹസം എഫ്സിക്ക് എതിരായ മത്സരത്തിന്‍റെ 68-ാം മിനിറ്റിലായിരുന്നു പോർച്ചുഗൽ താരത്തിന്‍റെ ഗോൾ. അൽ നസറിനായി സാദിയൊ മാനെയും (78’) ലക്ഷ്യം കണ്ടു. 5-1ന്‍റെ ജയമാണ് അൽ ഹസമിനെതിരേ അൽ നസർ കുറിച്ചത്. രണ്ട് ഗോളിന് അസിസ്റ്റ് നടത്തിയതും ക്രിസ്റ്റ്യാനോ റൊണാൾഡോ ആയിരുന്നു.
ലീഗിൽ ആറ് ഗോളുമായി റൊണാൾഡോ ടോപ് സ്കോറർ സ്ഥാനത്താണ്. അഞ്ച് ഗോളുമായി സാദിയൊ മാനെ തൊട്ടുപിന്നിലുണ്ട്. ഏറ്റവും കൂടുതൽ അസിസ്റ്റിൽ നാല് എണ്ണവുമായി റൊണാൾഡോ ഒന്നാം സ്ഥാനം പങ്കിടുന്നു.
