മാഹി: കോപ്പാലത്ത് കള്ളൻ വീട്ടിൽക്കയറി വീട്ടമ്മയുടെ മൊബൈൽ ഫോൺ കവർന്നു. കവർച്ച നടത്തിയ ശേഷം അടുക്കളയിൽ പാചകം ചെയ്തു വെച്ചിരുന്ന ചോറും കറിയും ഭക്ഷിച്ച് പാത്രങ്ങൾ തൊട്ടടുത്ത പറമ്പിൽ ഉപേക്ഷിച്ച് കടന്നു. ചവക്കമുക്കിലെ കുനിയിൽ ഷീനയുടെ വീട്ടിലാണ് മോഷണം നടന്നത്.
ഷീന പുതിയ വീട് പണിയുന്നതിനാൽ സമീപം താത്കാലിക ഷെഡ് കെട്ടിയായിരുന്നു താമസം. ഇതിന്‍റെ അടുക്കള ഭാഗത്തെ പൂട്ട് തകർത്താണ് കള്ളൻ അകത്ത് കയറിയത്.സമീപത്തെ നാലു വീടുകളിലും മോഷണശ്രമം നടന്നെങ്കിലും വീട്ടുകാർ ഞെട്ടി ഉണർന്നപ്പോൾ മോഷ്‌ടാവ് ഓടി രക്ഷപ്പെട്ടു. ന്യൂമാഹി എസ്ഐ സുമേഷും സംഘവും വീടുകളിൽ എത്തി അന്വേഷണം തുടങ്ങി.
