അഞ്ചൽ:കടക്കലില്‍ മത്സ്യ വ്യാപാരികള്‍ തമ്മിലുണ്ടായ സംഘര്‍ഷത്തിൽ രണ്ടുപേർക്ക് കുത്തേറ്റു. രാത്രിയിലാണ് സംഭവം. മത്സ്യ വ്യാപാരം നടത്തുന്ന അന്‍വര്‍, അസ്‌ലം എന്നിവര്‍ക്കാണ് കുത്തേറ്റത്. ഇരുവരെയും തിരുവനന്തപുരം മെഡിക്കല്‍കോളേജ് ആശുപത്രിയില്‍ പ്രവേശിപ്പിച്ചിട്ടുണ്ട്. ഇതില്‍ ഒരാളുടെ നില ഗുരുതരമാണ്.
സംഭവവുമായി ബന്ധപ്പെട്ട് കടക്കല്‍ പോലീസ് രണ്ടുപേരെ പിടികൂടി. താടി ബിനു എന്നറിയപ്പെടുന്ന ബിനു, ഷിബു എന്നിവരെയാണ് പിടികൂടിയത്. ഒരുമണിക്കൂറിലേറെ സ്ഥലത്ത് സംഘര്‍ഷാവസ്ഥയായിരുന്നു. കഴിഞ്ഞദിവസം കുത്തേറ്റ അന്‍വര്‍ അസ്‌ലം എനിവരടങ്ങുന്ന സംഘം ബിനുവിനെയും സുഹൃത്തായ നിസാമിനെയും ആക്രമിച്ചിരുന്നു.
അതിന്‍റെ പ്രതികാരമായിട്ടാണ് ഇരുകൂട്ടരും വീണ്ടും ഏറ്റുമുട്ടിയതെന്ന് പോലീസ് പറഞ്ഞു.
കടക്കല്‍ സര്‍ക്കിള്‍ ഇന്‍സ്പെക്ടര്‍, സബ്ഇന്‍സ്പെക്ടര്‍ എന്നിവരുടെ നേതൃത്വത്തില്‍ വന്‍ പോലീസ് സ്ഥലത്ത് ക്യാമ്പ് ചെയ്യുന്നുണ്ട്. അന്വേഷണം ആരംഭിച്ചതായി പോലീസ് പറഞ്ഞു.
