ചേർത്തല: എസ്എസ്എൽസി വിദ്യാർഥിനിയുമായി നാടുവിട്ട യുവാവിനെ പോലീസ് അറസ്റ്റ് ചെയ്തു. വൈക്കം തലയാഴം ആറാട്ടുപുഴ വീട്ടിൽ അരുണി (ആൽബി-20) നെയാണ് പോക്സോ വകുപ്പുപ്രകാരം പോലീസ് അറസ്റ്റ് ചെയ്തത്. മുളന്തുരുത്തിക്ക് സമീപത്തെ ക്ഷേത്രത്തിലെ ശാന്തിക്കാരനാണ് അരുണ്‍. ചേർത്തല സ്വദേശിനിയായ പെണ്‍കുട്ടി ഇവിടെ ബന്ധുവിന്‍റെ വീട്ടിലെത്തിയപ്പോഴാണ് ഇയാളുമായി പരിചയപ്പെട്ടത്.
കഴിഞ്ഞ രണ്ടിനായിരുന്നു പെണ്‍കുട്ടിയെ കാണാതായത്. തുടർന്ന് വീട്ടുകാർ പോലീസിൽ പരാതി നൽകുകയും മൂന്നിന് ഇരുവരെയും ചേർത്തലയിൽ നിന്ന് പിടികൂടുകയും ചെയ്തു. രണ്ടിനു വൈകുന്നേരം കോഴിക്കോട്ടേക്ക് ബസിൽ പോയെങ്കിലും പോലീസിൽ പരാതി നൽകിയതായി വീട്ടുകാർ ഇവരെ ഫോണിൽ അറിയിച്ചതിനെ തുടർന്ന് അടുത്ത ബസിൽ തിരികെ വീട്ടിലേക്ക് പോരുകയായിരുന്നുവെന്നാണ് പെണ്‍കുട്ടി പോലീസിന് ആദ്യം മൊഴി നല്കിയത്. ഇതിന്‍റെ അടിസ്ഥാനത്തിൽ ഇരുവരെയും അന്ന് വീട്ടുകാർക്കൊപ്പം വിട്ടയയ്ക്കുകയായിരുന്നു.
എന്നാൽ പിന്നീട് നടന്ന കൗണ്‍സിലിംഗിൽ പെണ്‍കുട്ടി യുവാവ് ഉപദ്രവിച്ച വിവരങ്ങൾ പറയുകയായിരുന്നു. തുടർന്ന് പോലീസ് വീണ്ടും പെണ്‍കുട്ടിയുടെ മൊഴിയെടുത്ത് പോക്സോ നിയമപ്രകാരം കേസെടുക്കുകയും പ്രതിയെ വീട്ടിൽ നിന്ന് അറസ്റ്റ് ചെയ്യുകയുമായിരുന്നു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
