കൊച്ചി: സിനിമാ മോഹം നൽകി പെണ്‍കുട്ടിയെ പീഡിപ്പിച്ച കേസിൽ പിടിയിലായ മധ്യവയസ്കൻ കൂടുതൽ പെണ്‍കുട്ടികളെ ചതിയിൽപ്പെടുത്തിയതായി വിവരം. ഇതുസംബന്ധിച്ച് ചില സൂചനകൾ ലഭിച്ചതായും അന്വേഷണം നടത്തിവരുന്നതായും പോലീസ് പറഞ്ഞു.
കേസുമായി ബന്ധപ്പെട്ട് ചാവക്കാട് ഞമങ്ങനാട് കൊട്ടാരപ്പാട്ട് ഇസ്മയിലിനെ (46) നെയാണു പാലാരിവട്ടം പോലീസ് പിടികൂടിയത്. സിനിമയിൽ അഭിനയിക്കാനും ടിവി പരിപാടികളിൽ അവതാരകയായും അവസരം വാങ്ങി കൊടുക്കാമെന്നു വാഗ്ദാനം നൽകിയാണ് പെണ്‍കുട്ടിയെ പീഡിപ്പിച്ചതെന്നു പോലീസ് പറഞ്ഞു.
ഇസ്മയിലിന്‍റെ ഫോണ് നന്പർ തിരിച്ചറിഞ്ഞു നടത്തിയ അന്വേഷണത്തിൽ കഴിഞ്ഞ ദിവസം രാത്രി ചാവക്കാട്ടെ വീട്ടിൽനിന്നാണ് ഇയാളെ പിടികൂടിയത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. സിനിമാരംഗത്തെ ഉന്നതരുമായി ബന്ധമുണ്ടെന്നു വിശ്വസിപ്പിച്ചു പെണ്‍കുട്ടിയേയും കൂട്ടുകാരികളെയും അഭിമുഖത്തിനെന്നു പറഞ്ഞു കൂട്ടിക്കൊണ്ടു പോയ പ്രതി രണ്ടുപേരെ സെലക്ട് ചെയ്തതായി അറിയിച്ചു.
തുടർന്നു ഹോട്ടൽ മുറിയിൽ മാഡം ഇൻറർവ്യൂ ചെയ്യാൻ കാത്തിരിപ്പുണ്ടെന്നു പറഞ്ഞു. ഇതു വിശ്വസിച്ചു മുറിയിലെത്തിയ പെണ്‍കുട്ടിയെ വാതിൽ പൂട്ടിയിട്ടശേഷം മാനഭംഗപ്പെടുത്തുകയായിരുന്നുവെന്നാണു പോലീസ് ഭാഷ്യം. ഇടപ്പള്ളിയിലെ വാടകവീട്ടിലാണ് ഇയാൾ താമസിച്ചുവന്നിരുന്നത്. പാലാരിവട്ടം എസ്എച്ച്ഒ എസ്. സനൽ, എസ്ഐ വി.എൻ. ജിബി എന്നിവരുടെ നേതൃത്വത്തിലായിരുന്നു അറസ്റ്റ്.
