താരജാഡ മാറ്റിവച്ച് പൊതുജനങ്ങളോട് ഇടപെടുന്ന രീതികൊണ്ട് ഏറെ അഭിനന്ദനങ്ങള്‍ വാങ്ങിയിട്ടുള്ള നടിയാണ് അനുശ്രീ. അഭിനയ മികവിന് പുറമേ, ആ ഒരു കാരണം കൊണ്ടുതന്നെ നിരവധി ആരാധകരും അനുശ്രീയ്ക്കുണ്ട്. അനുശ്രീ കേന്ത്ര കഥാപാത്രത്തെ അവതരിപ്പിക്കുന്ന ഓട്ടര്‍ഷ എന്ന ചിത്രം ഇപ്പോള്‍ തിയറ്ററുകളില്‍ ഓടിക്കൊണ്ടിരിക്കുന്നത്. മോശമല്ലാത്ത പ്രതികരണമാണ് ചിത്രത്തിന് ലഭിച്ചുകൊണ്ടിരിക്കുന്നതും.
ഓട്ടര്‍ഷയുടെ പ്രചരണാര്‍ത്ഥം ഫേസ്ബുക്ക് ലൈവില്‍ എത്തിയ അനുശ്രീയ്ക്ക് ഒരു യുവാവ് നല്‍കിയ കമന്റും അതിന് അനുശ്രീ നല്‍കിയ മറുപടിയുമാണ് കൗതുകമായിരിക്കുന്നത്. അനുശ്രീയുടെ മറുപടി സമൂഹമാധ്യമങ്ങള്‍ ഒന്നടങ്കം ഏറ്റെടുക്കുകയും ചെയ്തു.
‘കുണ്ടിലും, കുഴിയിലും വീണ് മനം മടുപ്പിച്ച് കൊല്ലുന്ന ഓട്ടോര്‍ഷ മുന്നൂറ് രൂപ സ്വാഹ’ എന്നായിരുന്നു ആഷിഖ് അലി എന്നയാള്‍ അനുശ്രീയുടെ ലൈവിന് ഇട്ട കമന്റ്. ഉടന്‍ തന്നെ അനുശ്രീ ഇയാള്‍ക്ക് മറുപടിയും നല്‍കി. ‘ആഷിഖ് അലിക്ക് എന്തുകൊണ്ടാണ് മുന്നൂറ് രൂപ പോയതെന്ന് എനിക്ക് മനസ്സിലാകുന്നില്ല. എന്റെ ഒഫീഷ്യല്‍ പേജിലേക്ക് ആഷിഖ് അലിയുടെ നമ്പറും അക്കൗണ്ട് ഡീറ്റെയ്ല്‍സും മെസേജ് ചെയ്യൂ. രണ്ടു ദിവസത്തിനകം മുന്നൂറ് രൂപ ഞാന്‍ ട്രാന്‍സ്ഫര്‍ ചെയ്തു തരാം. ജിഎസ്ടി വരുമോ എന്നറിയില്ല. പെട്ടെന്ന് തരാം പൈസ. നമുക്ക് ആരുടേയും നഷ്ടക്കച്ചോടത്തിനൊന്നും നിക്കണ്ട. അത്രയ്ക്ക് വിഷമം ഉണ്ടെങ്കില്‍ അക്കൗണ്ട് വിവരങ്ങള്‍ മെസേജ് ചെയ്യൂ കേട്ടോ’ – അനുശ്രീ പറഞ്ഞു.
നിരവധി പേര്‍ ലൈവില്‍ ചോദ്യങ്ങളുമായി എത്തിയിരുന്നു. ഇതിനിടെ ഇനിയും തേപ്പ് കഥാപാത്രങ്ങള്‍ ചെയ്യുമോ എന്നൊരു പ്രേക്ഷകന്‍ ചോദിച്ചപ്പോള്‍, ഇത്രയും വര്‍ഷങ്ങള്‍ക്കു ശേഷവും നിങ്ങള്‍ മഹേഷിന്റെ പ്രതികാരം എന്ന ചിത്രത്തിലെ സൗമ്യ എന്ന കഥാപാത്രത്തെ ഓര്‍ക്കുന്നെങ്കില്‍, അത് നല്ലൊരു കഥാപാത്രം ആയതുകൊണ്ടല്ലേ, അതിനാല്‍ നല്ല തിരക്കഥയാണെങ്കില്‍ അത്തരം വേഷങ്ങള്‍ ചെയ്യാന്‍ ഒരു മടിയുമില്ലെന്ന് അനുശ്രീ പറഞ്ഞു. ‘നിങ്ങളിലെ നടിയെ ഇഷ്ടമാണ് രാഷ്ട്രീയം ഇഷ്ടമല്ല’ എന്ന കമന്റിന് ‘നമുക്കങ്ങനെ രാഷ്ട്രീയമില്ലേ’ എന്നായിരുന്നു അനുശ്രീയുടെ മറുപടി.
