സ്ഫടികത്തിലെ മോഹൻലാൽ കഥാപാത്രത്തിന്‍റെ ഇതെന്‍റെ പുത്തൻ റെയ്ബാൻ ഗ്ലാസ് എന്ന ഡയലോഗ് ആവർത്തിച്ച് പ്രണവ് മോഹൻലാലിന്‍റെ കഥാപാത്രം. പ്രണവ് നായകനാകുന്ന ഇരുപത്തൊന്നാം നൂറ്റാണ്ട് എന്ന ചിത്രത്തിന്‍റെ ടീസറിലെ ഹൈലൈറ്റ് തന്നെ ഈ ഡയലോഗാണ്. അരുൺ ഗോപി സംവിധാനം ചെയ്യുന്ന ചിത്രം ആക്ഷന് പ്രാധാന്യമുള്ളതാണെന്ന് ടീസർ വ്യക്തമാക്കുന്നു.
നടൻ ദുൽഖർ സൽമാനാണ് ടീസർ പുറത്തു വിട്ടത്. അതിയായ സന്തോഷത്തോടെ എന്‍റെ ബേബി ബ്രൊ പ്രണവ് മോഹൻലാലിന്‍റെ പുതിയ ചിത്രമായ ഇരുപത്തൊന്നാം നൂറ്റാണ്ടിന്‍റെ ടീസർ റിലീസ് ചെയ്യുന്നുവെന്നാണ് ദുൽഖർ സോഷ്യൽ മീഡിയയിൽ ടീസർ റിലീസ് ചെയ്തുകൊണ്ട് അഭിപ്രായപ്പെട്ടത്.
നോട്ട് എ ഡോണ്‍ സ്റ്റോറി എന്നാണ് ചിത്രത്തിന്‍റെ ടാഗ് ലൈൻ.കേരളത്തിലും ഹൈദരാബാദ്, ദക്ഷിണാഫ്രിക്ക എന്നിവിടങ്ങളിലുമായാണ് ചിത്രീകരണം നടന്നത്. ഒരു സർഫറുടെ വേഷത്തിലാണ് പ്രണവ് ചിത്രത്തിൽ അഭിനയിക്കുന്നത്. ഇതിനായി ബാലിയിൽ പരിശീലനം പൂർത്തിയാക്കിയിരുന്നു.
ടോമിച്ചൻ മുളകുപാടമാണ് ചിത്രം നിർമിക്കുന്നത്. പീറ്റർ ഹെയ്ൻ ആണ് ആക്ഷൻ രംഗങ്ങൾ കൈകാര്യം ചെയ്യുന്നത്.
പുതുമുഖ താരം റേച്ചൽ ആണ് ചിത്രത്തിൽ നായികയാകുന്നത്. മനോജ് കെ. ജയൻ, കലാഭവന്‍ ഷാജോണ്‍, ധര്‍മജന്‍ ബോള്‍ഗാട്ടി, ജി സുരേഷ് കുമാർ എന്നിവരും അഭിനയിക്കുന്നു. ഗോപീസുന്ദറാണ് സംഗീത സംവിധായൻ. കാമറ- അഭിനന്ദ് രാമാനുജം.
