മലപ്പുറം: കോളജ് ഡേ ആഘോഷത്തിൽ അതിഥിയായി എത്തിയ യുവനടനെ പ്രിൻസിപ്പൽ സ്റ്റേജിൽനിന്ന് ഇറക്കി വിട്ടു. നടനും അവതാരകനുമായ ഡെയ്ൻ ഡേവീസിനാണ് വലിയപറന്പ് ബ്ലോസം ആർട്സ് ആന്‍റ് സയൻസ് കോളജ് പ്രിൻസിപ്പലിൽനിന്ന് ദുരനുഭവം നേരിടേണ്ടി വന്നത്.
ഡ്രസ് കോഡുമായി ബന്ധപ്പെട്ട വിഷയത്തിൽ പ്രിൻസിപ്പലും കുട്ടികളും തമ്മിൽ അഭിപ്രായ വ്യത്യാസമുണ്ടായിരുന്നു. കോളജ് പരിപാടികൾക്ക് വിദ്യാർഥികൾ വ്യത്യസ്ത നിറങ്ങളിൽ വസ്ത്രം ധരിക്കാറുണ്ട്. ഇത് പ്രിൻസിപ്പൽ വിലക്കി. എന്നാൽ കുട്ടികൾ ഈ നിർദേശം അനുസരിച്ചില്ല.
കോളജിൽ എത്തിയ നടനെ, പ്രിൻസിപ്പലിന്‍റെ വാക്ക് മറികടന്ന് വിദ്യാർഥികൾ വേദിയിൽ എത്തിച്ചെങ്കിലും, വേദിയിൽനിന്ന് ഇറങ്ങിപ്പോകാൻ നടനോട് പ്രിൻസിപ്പൽ നിർദേശിക്കുകയായിരുന്നു. സംഘർഷാവസ്ഥ ഉടലെടുത്തതോടെ നടൻ സംഭവസ്ഥലത്തുനിന്നു മടങ്ങി.
