നടിമാരുടെ സോഷ്യല്‍ മീഡിയ അക്കൗണ്ട് ഹാക്ക് ചെയ്യുന്നത് തുടര്‍ക്കഥയാവുന്നു. അക്ഷര ഹാസന്‍, ഹന്‍സിക മോദ് വാനി എന്നിവര്‍ക്കു പിന്നാലെ നടി മേഘ ആകാശിന്റെയും സോഷ്യല്‍ മീഡിയ അക്കൗണ്ട് ഹാക്ക് ചെയ്യപ്പെട്ടിരിക്കുകയാണ്.മേഘയുടെ ഇന്സ്റ്റാഗ്രാം അക്കൗണ്ടാണ് ഹാക്ക് ചെയ്യപ്പെട്ടത്. ധനുഷ് നായകനാകുന്ന എന്നൈ നോക്കി പായും തോട്ട എന്ന ഗൗതം മേനോന്‍ ചിത്രത്തിലെ നായികയാണ് മേഘ. തന്റെ അക്കൗണ്ട് ഹാക്ക് ചെയ്യപ്പെട്ട വിവരം മേഘ തന്നെ ട്വിറ്ററിലൂടെ വെളിപ്പെടുത്തുകയായിരുന്നു.
തന്റെ ഇന്സ്റ്റാഗ്രാം ഹാക്ക് ചെയ്തിരിക്കുകയാണെന്നും അതില്‍നിന്ന് മെസേജുകളും മറ്റും വന്നാല്‍ ഒഴിവാക്കണം എന്നും ഇന്സ്റ്റാഗ്രാം തിരിച്ചെടുക്കാനുള്ള ശ്രമത്തിലാണെന്നും മേഘ ട്വീറ്റ് ചെയ്തു. തുടര്‍ന്ന് ഏറെ പരിശ്രമത്തിനൊടുവില്‍ ഇന്സ്റ്റാഗ്രാം തിരിച്ചു പിടിച്ചുവെന്നു താരം വെളിപ്പെടുത്തി. തന്റെ സ്വകാര്യതയിലേക്കുള്ള ഈ കടന്നുകയറ്റം വല്ലാതെ ഭയപ്പെടുത്തിയെന്നും എന്നാല്‍ ഇപ്പോള്‍ അക്കൗണ്ട് തിരിച്ചുപിടിക്കാനായി എന്നും മേഘ ട്വീറ്റ് ചെയ്തു.
ഒരു പക്കാ കഥൈ എന്ന ചിത്രത്തിലൂടെ സിനിമാലോകത്ത് അരങ്ങേറിയ മേഘയുടെ രണ്ടാമത്തെ ചിത്രമാണ് എന്നൈ നോക്കി പായും തോട്ട. എന്നാല്‍ രണ്ട് ചിത്രങ്ങളും ഇതുവരെ റിലീസായിട്ടില്ല. രജനികാന്തിനൊപ്പം അഭിനയിച്ച പേട്ടയാണ് മേഘയുടെ പുറത്തിറങ്ങിയ ആദ്യചിത്രം. ഹാക്കര്‍മാര്‍ മേഘയുടെ ഇന്‍സ്റ്റഗ്രാം അക്കൗണ്ടിലെ എല്ലാ ചിത്രങ്ങളും ഡിലീറ്റ് ചെയ്തിരുന്നു. തുടര്‍ച്ചയായുള്ള ഹാക്കര്‍മാരുടെ ആക്രമത്തില്‍ ഞെട്ടിവിറച്ചിരിക്കുകയാണ് തമിഴ് സിനിമാലോകം.
