മുംബൈ: ഐപിഎൽ ട്വന്‍റി-20 പ്രകടനത്തിന്‍റെ അടിസ്ഥാനത്തിൽ ഏകദിന ലോകകപ്പിനുള്ള ഇന്ത്യൻ ടീമിനെ തെരഞ്ഞെടുക്കുക അസാധ്യമെന്ന് മുംബൈ ഇന്ത്യൻസ് ക്യാപ്റ്റൻ രോഹിത് ശർമ.
കഴിഞ്ഞ നാല് വർഷത്തെ പ്രകടനത്തിന്‍റെ അടിസ്ഥാനത്തിലേ ലോകകപ്പ് ടീമിനെ തെരഞ്ഞെടുക്കാൻ സാധിക്കൂ എന്ന് ഇന്ത്യൻ ഉപനായകൻകൂടിയായ രോഹിത് പറഞ്ഞു. നേരത്തേ ഇതേ അഭിപ്രായപ്രകടനം ഇന്ത്യൻ ക്യാപ്റ്റൻ വിരാട് കോഹ് ലിയും നടത്തിയിരുന്നു.
എന്നാൽ, ബിസിസിഐ അംഗവും മുൻ ക്യാപ്റ്റനുമായ സൗരവ് ഗാംഗുലി ലോകകപ്പ് ടീം തെരഞ്ഞെടുപ്പിൽ ഐപിഎൽ ഒരു ഘടകമാകുമെന്ന് അഭിപ്രായപ്പെട്ടു. ഈ മാസം 20നുള്ളിൽ ഇന്ത്യയുടെ ലോകകപ്പ് ടീമിനെ പ്രഖ്യാപിക്കുമെന്ന് മുഖ്യ സെലക്ടർ എം.എസ്.കെ. പ്രസാദ് അറിയിച്ചിട്ടുണ്ട്. മേയ് 30നാണ് ലോകകപ്പ് പോരാട്ടം തുടങ്ങുക. മേയ് 12നാണ് ഐപിഎൽ ഫൈനൽ.
