കണ്ണൂർ: കൂട്ടുപുഴയിൽ നടത്തിയ വാഹനപരിശോധനയിൽ ഒമ്പത് കിലോ കഞ്ചാവുമായി മൂന്നംഗസംഘം അറസ്റ്റിൽ. എക്സൈസ് കമ്മീഷണർ സ്പെഷൽ സ്ക്വാഡ് സർക്കിൾ ഇൻസ്പെക്ടർ പി.കെ.സതീഷ് കുമാറിന്‍റെ നേതൃത്വത്തിലുള്ള എക്സൈസ് സംഘമാണ് പിടികൂടിയത്. കണ്ണൂരിലെ പ്രധാന കഞ്ചാവ് മൊത്ത വില്പനക്കാരൻ മാച്ചേരി സ്വദേശി ശ്രീപുരം വീട്ടിൽ കെ. രഞ്ചിത്ത് (34), കണ്ണോത്തുംചാൽ സ്വദേശിയായ വിപു എന്നു വിളിക്കുന്ന വിപിൻ (41), കൊറ്റാളി സ്വദേശി ഇല്ലത്ത് വളപ്പിൽ കെ.വി സനീഷ് (32) എന്നിവരെയാണ് ഇന്നു പുലർച്ചെ മൂന്നോടെ അറസ്റ്റ് ചെയ്തത്. കഞ്ചാവു കടത്താൻ ഉപയോഗിച്ച കെഎൽ 13 എകെ 4973 നന്പർ മാരുതി കാറും കസ്റ്റഡിയിൽ എടുത്തു.
കണ്ണൂരിലെ ചെറുകിട കഞ്ചാവു കച്ചവടക്കാരിൽ നിന്നും മുൻകൂട്ടി ഓർഡർ എടുക്കുന്ന പ്രകാരം കിലോക്കണക്കിന് കഞ്ചാവാണ് രഞ്ചിത്ത് അയൽ സംസ്ഥാനങ്ങളിൽ നിന്നും കടത്തിക്കൊണ്ടു വരുന്നതെന്ന് സർക്കിൾ ഇൻസ്പെക്ടർ പി.കെ.സതീഷ് കുമാർ രാഷ്‌ട്രദീപികയോട് പറഞ്ഞു. ഇയാൾക്കെതി നിരവധി കേസുകൾ ഇപ്പോൾ നിലവിലുണ്ട് .അതിലൊരു കേസിൽ ജാമ്യം ലഭിച്ച് ആഴ്ച്ചകൾക്കു മുൻപാണ് ഇയാൾ ജയിലിൽ നിന്ന് പുറത്തു വന്നത്.
ലോക്സഭാ തെരഞ്ഞെടുപ്പിനോടനുബന്ധിച്ച് ജില്ലയിലേക്ക് വൻതോതിൽ ലഹരിക്കടത്ത് നടക്കാൻ സാധ്യതയുള്ളതിനാൽ ലഹരിക്കടത്ത് സംഘത്തെക്കുറിച്ച് രഹസ്യ നിരീക്ഷണം നടത്തവെയാണ് വിവരം ലഭിക്കുന്നത്. എക്സൈസ് കമ്മീഷണർ സ്പെഷൽ സ്ക്വാഡ് അംഗം പി.ജലീഷ്, ഉത്തരമേഖലാ ജോയിന്‍റ് എക്സൈസ് കമ്മിഷണർ സ്ക്വാഡ് അംഗം കെ.ബിനീഷ്, എക്സൈസ് നാർകോട്ടിക് സ്പെഷൽ സ്ക്വാഡ് അംഗങ്ങളായ പ്രിവന്‍റീവ് ഓഫിസർ വി.കെ.ഷിബു, സിവിൽ എക്സൈസ് ഓഫീസർമാരായ ടി.വി.ഉജേഷ് , പി.ടി.ശരത്, സീനിയർ എക്സൈസ് ഡ്രൈവർ കെ. ഇസ്മയിൽ എന്നിവരടങ്ങുന്ന സംഘമാണ് കഞ്ചാവ് പിടികൂടിയത്.
വരും ദിവസങ്ങളിൽ എക്സൈസിന്‍റെ ശക്തമായ പരിശോധന നടക്കുമെന്ന് ഡെപ്യൂട്ടി എക്സൈസ് കമ്മീഷണർ പി.കെ. സുരേഷ് അറിയിച്ചു. പ്രതികളെ മട്ടന്നൂർ ജുഡിഷൽ ഫസ്റ്റ് ക്ലാസ് മജിസ്ട്രേറ്റ് കോടതി മുമ്പാകെ ഹാജരാക്കും.
