ന്യൂഡൽഹി: പ്രധാനമന്ത്രി നരേന്ദ്ര മോദി അഞ്ച് വർഷത്തിനിടെ ആദ്യമായി നടത്തിയ പത്രസമ്മേളനത്തെ പരിഹസിച്ച് കോണ്ഗ്രസ് അധ്യക്ഷൻ രാഹുൽ ഗാന്ധി രംഗത്ത്. വളരെ മികച്ച പത്രസമ്മളനമാണ് നടത്തിയതെന്നും മോദിജിയെ അഭിനന്ദിക്കുന്നതായും രാഹുൽ ട്വിറ്ററിൽ കുറിച്ചു. അടുത്ത പത്രസമ്മേളനത്തിലെങ്കിലും ഏതാനും ചോദ്യങ്ങൾക്ക് ഉത്തരം പറയാൻ അമിത് ഷാ താങ്കളെ അനുവദിക്കുമെന്നു കരുതുന്നതായും അദ്ദേഹം പരിഹസിച്ചു.
പ്രധാനമന്ത്രി പദത്തിലെത്തിയതിനു ശേഷം മോദി പത്രസമ്മേളനം നടത്തുന്നില്ലെന്നും പ്രധാനമന്ത്രി മാധ്യമ പ്രവർത്തകരുടെ ചോദ്യത്തെ ഭയക്കുകയാണെന്നും രാഹുൽ തുടർച്ചയായി ആരോപിച്ചിരുന്നു. ഇതിന്‍റെ പശ്ചാത്തലത്തിലാണ് അപ്രതീക്ഷിതമായി നരേന്ദ്ര മോദി പത്രസമ്മേളനത്തിൽ പങ്കെടുത്തത്. എന്നാൽ, പ്രധാനമന്ത്രിക്കു നേരേ ഉന്നയിച്ച ചോദ്യങ്ങൾക്ക് മറുപടി നൽകുന്നതിൽ നിന്ന് ഒഴിഞ്ഞ അദ്ദേഹം, പാർട്ടി അധ്യക്ഷൻ മറുപടി നൽകുമെന്ന് അറിയിക്കുകയായിരുന്നു.
