പാരീസ്: റോജർ ഫെഡററും റഫേൽ നദാലും ഫ്രഞ്ച് ഓപ്പൺ നാലാം റൗണ്ടിൽ കടന്നു. ഇതോടെ ഏറ്റവും കൂടുതൽ തവണ പ്രീ ക്വാർട്ടറിൽ എത്തുന്ന താരങ്ങളെന്ന റിക്കാർഡ് ഇരുവരും സ്വന്തമാക്കി. പാരീസിൽ 14 തവണയാണ് ഇവർ അവസാന 16 ൽ കടക്കുന്നത്. അമേരിക്കയുടെ മുൻ ലോക ഒന്നാം നമ്പർ ബഡ്ജ് പാറ്റിയെയാണ് ഇരുവരും മറികടന്നത്.
ഫെഡറർ നോർവെയുടെ കാസ്പർ റൂഡിനെ പരാജയപ്പെടുത്തിയാണ് നാലാം റൗണ്ടിലേക്ക് മുന്നേറിയത്. നേരിട്ടുള്ള സെറ്റുകൾക്കായിരുന്നു വിജയം. സ്കോർ: 6-3, 6-1, 7-6 (10-8). നാലാം റൗണ്ടിൽ അർജന്‍റീനയുടെ ലിയോനാർഡോ മേയർ ആണ് നാലാം റൗണ്ടിൽ ഫെഡററുടെ എതിരാളി.
ബെൽജിയത്തിന്‍റെ ഡേവിഡ് ഗോഫിനെ മറികടന്നാണ് നദാൽ നാലാം റൗണ്ടിൽ പ്രവേശിച്ചത്. ഒന്നിനെതിരെ മൂന്നു സെറ്റുകൾക്കാണ് നദാലിന്‍റെ ജയം. സ്കോർ: 6-1, 6-3, 4-6, 6-3. അർജന്‍റീനയുടെ യുവാൻ ഇഗ്നാസിയോ ലോൺഡെറോ ആണ് അടുത്ത റൗണ്ടിൽ നദാലിന്‍റെ എതിരാളി.
