കൊല്ലം: ട്രെയിൻ യാത്രയ്ക്കിടയിൽ കാണാതായ പതിനാറുകാരിയായ പെൺകുട്ടിയെ കൊല്ലത്തു നിന്ന് കണ്ടെത്തി. പെൺകുട്ടിയെ ഇന്നലെ രാത്രി 11.30ഓടെയാണ് കൊല്ലം റെയിൽവേ സ്റ്റേഷനിലെ വെയിറ്റിംഗ് ഹാളിൽ കാണപ്പെട്ടത്. കുട്ടി കൊല്ലം റെയിൽവേ സ്റ്റേഷനിലെത്തിയതായി ചടയമംഗലം പോലീസിന് വിവരം ലഭിച്ചു. ചടയമംഗലം പോലീസ് കൊല്ലം ഈസ്റ്റ് പോലീസിലറിയിക്കുകയായിരുന്നു. ഈസ്റ്റ് പോലീസെത്തി റെയിൽവേസ്റ്റേഷനിലെ വെയിറ്റിംഗ് ഹാളിൽനിന്ന് കുട്ടിയെ കൊണ്ടുപോയി.
കഴിഞ്ഞ വെള്ളിയാഴ്ചയാണ് കുട്ടിയെ കാണാതായത്. ചോറ്റാനിക്കരയിൽ ജോലി ചെയ്യുന്ന അമ്മയെ കണ്ട ശേഷം എറണാകുളത്തു നിന്നും മംഗളൂരുവിലേക്കുള്ള ട്രെയിനിൽ മടങ്ങവേയാണ് കാണാതായത്. വൈകിട്ട് 6ന് കോഴിക്കോട്ട് റെയിൽവേ സ്റ്റേഷനിൽ ഇറങ്ങേണ്ട കുട്ടിയെ കാണാതായതോടെ കുട്ടിയുടെ പിതാവ് കുട്ടിയെ കാണാതായ വിവരം ചിത്രമുൾപ്പെടെ ഫേസ്ബുക്കിൽ പോസ്റ്റ് ചെയ്യുകയും കുട്ടിയെ കണ്ടെത്താൻ സഹായമഭ്യർഥിക്കുകയും ചെയ്തു.
ഇന്നലെ രാത്രി ഈസ്റ്റ് പോലീസ് വിവരമറിയിച്ചതനുസരിച്ച് ചോറ്റാനിക്കര പോലീസും കുട്ടിയുടെ മാതാവും ഇന്നു രാവിലെയെത്തി കുട്ടിയെ കൂട്ടിക്കൊണ്ടുപോകുകയായിരുന്നു. കുട്ടിയെ കണ്ടെത്തിയ വിവരവും പിതാവ് ഫേസ്ബുക്കിൽ പോസ്റ്റ് ചെയ്തിട്ടുണ്ട്.
