പയ്യോളി: തിക്കോടി ഡ്രൈവ് ഇന്‍ ബീച്ചില്‍ ദമ്പതികളെ ആക്രമിച്ച സംഭവത്തില്‍ രണ്ടുപേര്‍ പോലീസ് പിടിയിലായി. തിക്കോടി അയ്യിട്ട വളപ്പില്‍ സലീം (32), തിക്കോടി പള്ളിപ്പറമ്പത്തു മന്‍സൂര്‍ (34) എന്നിവരാണ് പയ്യോളി പോലീസിന്‍റെ പിടിയിലായത്. പേരാന്പ്ര കോടതിയില്‍ ഹാജരാക്കിയ ഇവര്‍ റിമാൻഡിലായി.
പത്തുപേര്‍ക്കെതിരെയാണ് പയ്യോളി പോലീസ് സംഭവത്തില്‍ കേസെടുത്തത്. സംഭവത്തിന് ശേഷം ഒളിവിലായിരുന്നു ഇവര്‍. മറ്റ് പ്രതികള്‍ക്ക് വേണ്ടി അന്വേഷണം തുടരുകയാണ്.ഇന്നലെ ആക്രമണം നടന്ന തിക്കോടി ഡ്രൈവ് ഇന്‍ ബീച്ചിലേക്ക് ഡിവൈഎഫ്ഐ പയ്യോളി ബ്ലോക്ക് കമ്മിറ്റി നടത്തിയ മാര്‍ച്ചില്‍ പ്രതിഷേധമിരമ്പി.
വൈകീട്ട് തിക്കോടി പഞ്ചായത്ത് ബസാറില്‍ നിന്നാരംഭിച്ച മാര്‍ച്ചിന് ഡിവൈഎഫ്ഐ പയ്യോളി ബ്ലോക്ക് സെക്രട്ടറി എ.കെ. ഷൈജു, ബ്ലോക്ക് പ്രസിഡന്‍റ് പി. അനൂപ്, എ.വി. ഷിബു, എ.കെ. രജീഷ്, ടി. നിത്തു, എം. ടി. രഞ്ജിത്ത് എന്നിവര്‍ നേതൃത്വം നല്‍കി. പ്രതിഷേധ മാര്‍ച്ച് സിപിഎം പയ്യോളി ഏരിയ സെക്രട്ടറി എം.പി. ഷിബു ഉദ്ഘാടനം ചെയ്തു.
