റെന്നസ്: യൂറോപ്യൻ ചാമ്പ്യന്മാരായ നെതർലൻഡ്സ് വനിതാ ലോകകപ്പ് ഫുട്ബോളിന്‍റെ ക്വാർട്ടർ ഫൈനലിൽ പ്രവേശിപ്പിച്ചു. പ്രീക്വാർട്ടർ പോരാട്ടത്തിൽ ജപ്പാനെ ഒന്നിനെതിരെ രണ്ടു ഗോളുകൾക്ക് തോൽപ്പിച്ചാണ് നെതർലൻഡ്സ് വനിതകളുടെ മുന്നേറ്റം. ക്വാർട്ടറിൽ ഇറ്റലിയാണ് എതിരാളി.
ബാഴ്സലോണ താരമായ ലീകെ മാർടെൻസിന്‍റെ ഇരട്ട ഗോളാണ് നെതർലൻഡ്സിന് ജയം സമ്മാനിച്ചത്. മികച്ച രീതിയിൽ തുടങ്ങിയ നെതർലൻഡ്സ് 17-ാം മിനിറ്റിൽ ലീഡെടുത്തു. 47-ാം മിനിറ്റിൽ ഹസെഗാവയിലൂടെ ജപ്പാൻ ഒപ്പമെത്തി. എന്നാൽ 90-ാം മിനിറ്റിൽ ഹാൻഡ്ബോളിന് ലഭിച്ച പെനാൽറ്റിയിലൂടെ നെതർലൻഡ്സിന്‍റെ ജയമെത്തി.
നേരത്തെ, ചൈനയെ എതിരില്ലാത്ത രണ്ടു ഗോളുകൾക്ക് തോൽപ്പിച്ചാണ് ഇറ്റലി ക്വാർട്ടറിൽ കടന്നത്. ശനിയാഴ്ചയാണ് ഇറ്റലി-നെതർലൻഡ്സ് ക്വാർട്ടർ പോരാട്ടം.
