ലണ്ടൻ: വിംബിൾഡണിൽ ഏഴുതവണ ചാമ്പ്യനായിട്ടുള്ള അമേരിക്കൻ സൂപ്പർ താരം സെറീന വില്യംസ് കൗമാരക്കാരിയോട് വിറച്ചു ജയിച്ചു. ജയത്തോടെ സെറീന മൂന്നാം റൗണ്ടിലേക്കു കടന്നു. സ്ലൊവേനിയയുടെ കാജ യുവാനാണ് സെറീനയെ വിറപ്പിച്ച ശേഷം കീഴടങ്ങിയത്.
ലോക റാങ്കിംഗിൽ 133 ാം സ്ഥാനത്തുമാത്രമുള്ള പതിനെട്ടുകാരി യുവാൻ അമേരിക്കൻ വെറ്ററൻ താരത്തെ നിഷ്പ്രഭയാക്കി ആദ്യ സെറ്റ് സ്വന്തമാക്കി. രണ്ടുതവണ സെറീനയുടെ സെർവ് ബ്രേക്ക് ചെയ്യാനും ആദ്യസെറ്റിൽ സ്ലൊവേനിയക്കാരിക്ക് സാധിച്ചു.
പതിനൊന്നാം സീഡായ സെറീന രണ്ടാം സെറ്റിൽ ശക്തമായ തിരിച്ചുവരവ് നടത്തി. മൂന്നാം സെറ്റിൽ സെറീനയുടെ പരിചയസമ്പത്തിനു മുന്നിൽ പരാജയപ്പെട്ട കൗമാര താരത്തിനു സെറ്റും മത്സരവും നഷ്ടമായി. ഒരുമണിക്കൂറും 36 മിനിറ്റും മത്സരം നീണ്ടുനിന്നു. സ്കോർ: 2-6, 6-2, 6-4.
