മൈനാഗപ്പള്ളി: പോലീസിൽ തനിക്ക് നിയന്ത്രണം നഷ്ടപ്പെട്ടതായി സ്വയം സമ്മതിച്ച മുഖ്യമന്ത്രി പിണറായി വിജയൻ ആഭ്യന്തര വകുപ്പ് ഒഴിയണമെന്ന് ഡി.സി.സി പ്രസിഡന്റ് ബിന്ദുകൃഷ്ണ ആവശ്യപ്പെട്ടു. വിവിധ ആവശ്യങ്ങൾ ഉന്നയിച്ച് യു.ഡി.എഫ് മൈനാഗപ്പള്ളി മണ്ഡലം കമ്മറ്റിയുടെ നേതൃത്വത്തിൽ മൈനാഗപ്പള്ളി പഞ്ചായത്ത് ഓഫീസിന് മുന്നിൽ ധർണ ഉത്ഘാടനം ചെയ്ത് പ്രസംഗിക്കുകയായിരുന്നു അവർ.
ഇന്ത്യയിലെ ഏറ്റവും മികച്ച ഭരണഘടനാ സ്ഥാപനമായ പി.എസ്.സി യുടെ വിശ്വാസ്യത പോലും ഈ ഭരണത്തിൽ നഷ്ടപ്പെട്ടു. മത്സര പരീക്ഷയിൽ വിജയിക്കാൻ എസ്.എഫ്.ഐ ,ഡി.വൈ.എഫ്.ഐ അംഗമായാൽ മതിയെന്ന അവസ്ഥയാണിപ്പോൾ.രാജീവ് ഗാന്ധി വിഭാവനം ചെയ്ത പഞ്ചായത്തി രാജ് സംവിധാന ത്തെ ഇല്ലാതാക്കുകയാണ് സിപിഎം ചെയ്യുന്നതെന്നും ബിന്ദു കൃഷ്ണ പറഞ്ഞു .
യു ഡി എഫ് മണ്ഡലം ചെയർമാൻ കെ.മുസ്തഫ അദ്ധ്യക്ഷത വഹിച്ചു. പി. രാജേന്ദ്രപ്രസാദ് ,വൈ.ഷാജഹാൻ, തോമസ് വൈദ്യൻ, തുണ്ടിൽ നൗഷാദ് , രവി മൈനാഗപ്പള്ളി, പി.എം.സെയ്ദ് , സിജു കോശി വൈദ്യൻ , വി.രാജീവ് ഇടവനശ്ശേരി സുരേന്ദ്രൻ, എന്നിവർ പ്രസംഗിച്ചു.
