കൂത്തുപറമ്പ്: ആർഎസ്എസ് നേതാവ് വത്സൻ തില്ലങ്കേരി സഞ്ചരിച്ച ബൊലേറോ ജീപ്പ് കതിരൂരിനടുത്ത് ആറാം മൈലിൽ വച്ച് നിയന്ത്രണം വിട്ടു മറിഞ്ഞു. വത്സൻ തില്ലങ്കേരിക്കും ഗൺമാൻ അരുണി (30) നും പരിക്കേറ്റു. തലയ്ക്കും പുറത്തും പരിക്കേറ്റ വത്സൻ തില്ലങ്കേരിയെ തലശേരി ഇന്ദിരാഗാന്ധി സഹകരണാശുപത്രിയിൽ പ്രവേശിപ്പിച്ചു.
ചെറിയൊരു ഓപ്പറേഷന് വിധേയമാക്കിയ ഇദ്ദേഹത്തെ പിന്നീട് റൂമിലേക്ക് മാറ്റി. ഗൺമാൻ അരുണിന്‍റെ പരിക്ക് സാരമുള്ളതല്ല. ഡ്രൈവർ രജിത്ത് പരിക്കേൽക്കാതെ രക്ഷപ്പെട്ടു. പുലർച്ചെ 4.45 ഓടെയാണ് സംഭവം. ആറാം മൈൽ ബസ് സ്റ്റോപ്പിനു സമീപം ജീപ്പ് നിയന്ത്രണം വിട്ടു മറിയുകയായിരുന്നു.
വീട്ടിൽ നിന്ന് കൊല്ലത്തെ പരിപാടിയിൽ പോകാനായി തലശേരി റെയിൽവേ സ്റ്റേഷനിലേക്കു പോകുകയായിരുന്നു വത്സൻ തില്ലങ്കേരി. ഹൈവേ പട്രോളിംഗ് സംഘമാണ് പരിക്ക് പറ്റിയവരെ ആശുപത്രിയിൽ എത്തിച്ചത്.
