തിരുവനന്തപുരം: സോണിയ ഗാന്ധിയെ കോണ്‍ഗ്രസിന്‍റെ ഇടക്കാല അധ്യക്ഷയായി തെരഞ്ഞെടുത്തില്‍ സന്തോഷം പങ്കുവെച്ച് പ്രതിപക്ഷ നേതാവ് രമേശ് ചെന്നിത്തല. വളരെയേറെ ആഹ്ലാദിക്കുന്ന നിമിഷമാണിതെന്ന് അദ്ദേഹം പറഞ്ഞു. ഇന്ത്യയിലെ കോണ്‍ഗ്രസിന്‍റെ അഭിമാനം ഉയര്‍ത്തിപ്പിടിക്കാന്‍ ഈ തീരുമാനത്തിലൂടെ കഴിഞ്ഞെന്നും ചെന്നിത്തല ഫേസ്ബുക്കിൽ കുറിച്ചു.
അധ്യക്ഷസ്ഥാനത്ത് സോണിയ ഗാന്ധിയുടെ പേരുവന്നതോടെ പുതിയ ആത്മവിശ്വാസത്തോടെ മുന്നോട്ട് പോകാനുള്ള കരുത്ത് രാജ്യത്തെ കോണ്‍ഗ്രസ് പ്രവര്‍ത്തകര്‍ക്ക് കൈവന്നിരിക്കുന്നുവെന്നും ഇന്ത്യയിലെ രാഷ്ട്രീയ ചരിത്രത്തില്‍ നെഹ്റു കുടുംബത്തിന്‍റെ ത്യാഗത്തിന് വലിയ വിലയുണ്ടെന്നും അദ്ദേഹം വ്യക്തമാക്കി.
സോണിയ ഗാന്ധി അധ്യക്ഷയാകുന്നത് കോണ്‍ഗ്രസിനെ കൂടുതല്‍ ശക്തിപ്പെടുത്തുക മാത്രമേ ചെയ്യുകയുള്ളുവെന്നും ചെന്നിത്തല കൂട്ടിച്ചേർത്തു. ശനിയാഴ്ച തലസ്ഥാനത്ത് ചേർന്ന കോൺഗ്രസ് പ്രവർത്തക സമിതി യോഗമാണ് സോണിയയെ ഇടക്കാല അദ്യക്ഷയായി തെരഞ്ഞെടുത്തത്.
