വടകര: പഴയ സ്റ്റാന്‍റിനു സമീപത്തെ ഗുരു ട്രേഡിങ്ങ് കന്പനി ഉടമ എ.ജി.ഐ.ഗുരുസ്വാമിയുടെ ഉടമസ്ഥതയിലുള്ള ഗുരു ട്രേഡേഴ്സിൽ എത്തിയ വിരുതനും സ്ത്രീയും ചേർന്നു 33,000 രൂപ തട്ടിയെടുത്തതായി പരാതി. വ്യാഴാഴ്ച ഉച്ചക്കാണ് സംഭവം. കടയിലെത്തിയ ഇവർ ആയിരം രൂപയുടെ കറൻസി നോട്ടിന് ആവശ്യപ്പെടുകയായിരുന്നു. ഇവരുടെ പെരുമാറ്റത്തിൽ സംശയം തോന്നിയിരുന്നില്ല.
ആയിരം രൂപയുടെ നോട്ട് നിലവിലില്ലെന്ന് ഗുരുസ്വാമി പറഞ്ഞതോടെ 2000, 500 രൂപയുടെ നോട്ടുകൾ കാണാൻ താൽപര്യമുണ്ടെന്ന് പറഞ്ഞു. ഇതേ തുടർന്ന് മേശയിൽ നിന്നു 2000, 500 രൂപ അടങ്ങുന്ന നോട്ടുകളുടെ എണ്ണി തിട്ടപ്പെടുത്തിയ കെട്ട് ഇവർക്ക് നൽകി. ഇതിനിടയിൽ കടയുടമയുടെ ശ്രദ്ധ തിരിക്കാൻ സ്ത്രീ പല സംശയങ്ങളും ചോദിച്ചിരുന്നു. പ്രതികൾ കട ഉടമയ്ക്ക് പണം തിരികെ നൽകി യാത്ര പറഞ്ഞ് ഇറങ്ങി.
ഇവർ പുറത്തേക്ക് പോയ ശേഷം പണം എണ്ണി തിട്ടപ്പെടുത്തിയപ്പോഴാണ് 33,000 രൂപ നഷ്ടപ്പെട്ടതായി അറിയുന്നത്. സമീപത്തെ കടയുടെ സിസിടിവി യിൽ നിന്നും പ്രതികളുടെ ദൃശ്യങ്ങൾ തെളിഞ്ഞിട്ടുണ്ട്. സംഭവത്തിൽ വടകര പോലീസ് അന്വേഷണം ആരംഭിച്ചു.
