സുൽത്താൻ ബത്തേരി: യാത്രക്കാരിയുടെ മാല പൊട്ടിച്ച് രക്ഷപ്പെടാൻ ശ്രമിച്ച കർണ്ണാടക സ്വദേശിനിയെ ബത്തേരി പോലീസ് അറസ്റ്റു ചെയ്തു. കർണാടക മംഗളൂരു ഹൊസനഹള്ളി സ്വദേശിനി കല (30)നെയാണ് അറസ്റ്റ് ചെയ്തത്. ഇന്നലെ വൈകുന്നേരം 5.30 ഓടെ ബത്തേരി പഴയ ബസ്സ്റ്റാൻഡിൽ വച്ചാണ് ഇവർ ബസ് യാത്രക്കാരിയുടെ മാല പൊട്ടിച്ചത്.
ബസിൽ കയറുന്നതിന്നിടെ പുറകിൽ നിന്ന കല യാത്രക്കാരിയുടെ അഞ്ചര പവന്‍റെ മാല പൊട്ടിക്കുകയായിരുന്നു. മാല പൊട്ടിച്ചതറിഞ്ഞ യാത്രക്കാരി കവർച്ചക്കാരിയുടെ കയ്യിൽ പിടിച്ചു. ഉടനെ മാല നിലത്തിട്ട് ഓടി രക്ഷപ്പെടാൻ ശ്രമിച്ച ഇവരെ മറ്റു യാത്രക്കാർ ചേർന്ന് പിടികൂടി പോലീസിൽ ഏൽപ്പിച്ചു.
ബത്തേരി എസ്എച്ച്ഒ എം.ഡി. സുനിൽ ഇവർക്കെതിരെ കേസെടുത്ത് കോടതിയിൽ ഹാജരാക്കി. പിടിയിലായ സ്ത്രീയുടെ പേര് കല എന്നാണ് പറയുന്നതെങ്കിലും യഥാർത്ഥ പേര് അതല്ലെന്നും മറ്റ് പല സ്ഥലങ്ങളിലും ഇവർ ഇത്തരത്തിൽ മോഷണം നടത്തിയിട്ടുണ്ടന്നും പോലീസ് പറഞ്ഞു.
