തൃശൂർ: ചടങ്ങുകളിൽ പൂക്കൾ, ഷാളുകൾ, മെമന്‍റോകൾ തുടങ്ങിയവയ്ക്കു പകരം പുസ്തകം മതിയെന്നു നിലപാടെടുത്ത ടി.എൻ. പ്രതാപൻ എം.പിക്കു മൂന്നുമാസം കൊണ്ടു ലഭിച്ചത് മൂവായിരം പുസ്തകം.എംപിമാരുടെ സത്യപ്രതിജ്ഞ കഴിഞ്ഞ ജൂണ്‍ 17 മുതൽ സെപ്റ്റംബർ 17 ന് മൂന്നുമാസം പൂർത്തിയായി.
തനിക്കു ലഭിക്കുന്ന പുസ്തകങ്ങൾ ഉപയോഗിച്ച് ആദ്യം സ്വന്തം ഗ്രാമത്തിലെ സ്നേഹതീരം ബീച്ചിൽ പുതിയ വായനശാല തുറക്കുമെന്നു ടി.എൻ. പ്രതാപൻ അറിയിച്ചിരുന്നു. പിന്നീട് പാർലമെന്‍റ് മണ്ഡലത്തിലെ ഏഴു നിയമസഭാ മണ്ഡലങ്ങളിൽനിന്നും തെരഞ്ഞെടുക്കപ്പെട്ട മികച്ച വായനശാലകൾക്കും മികച്ച വിദ്യാലയ ലൈബ്രറികൾക്കും പുസ്തകങ്ങൾ സമ്മാനിക്കും.
മികച്ച റഫറൻസ് ഗ്രന്ഥങ്ങൾ, കഥ, കവിത, നോവലുകൾ, യാത്രാവിവരണങ്ങൾ, ബാലസാഹിത്യം, മതഗ്രന്ഥങ്ങൾ തുടങ്ങി എല്ലാവിഭാഗം പുസ്തകങ്ങളും സമ്മാനമായി ലഭിച്ചിട്ടുണ്ട്.50 പുസ്തകങ്ങൾ സമ്മാനിക്കുന്ന വ്യക്തികളുടെ വീടുകളിലും സ്ഥാപനങ്ങളിലും എംപി നേരിട്ടു സന്ദർശിച്ച് “പുസ്തക നിധി’ ശേഖരിക്കും.
ജില്ലയ്ക്കു പുറത്തുനിന്നും നിരവധി പേർ പുസ്തകങ്ങൾ സമ്മാനിച്ചിട്ടുണ്ട്.അയ്യന്തോൾ ചുങ്കത്തുള്ള എംപിയുടെ ഓഫീസിൽ ലഭിച്ച പുസ്തകങ്ങൾ തരംതിരിച്ച് സൂക്ഷിച്ചിരിക്കുകയാണ്.
