കോഴിക്കോട്: കൂടത്തായ് കൊലപാതക പരമ്പരയിലെ റോയ് തോമസ് കൊലക്കേസില്‍ ജോളിയുടെ രണ്ടാംഭര്‍ത്താവ് പുലിക്കയം പൊന്നാമറ്റത്ത് ഷാജുവിന്‍റേതുള്‍പ്പെടെ നാലുപേരുടെ രഹസ്യമൊഴി രേഖപ്പെടുത്തുന്നതിനായി ഹാജരാകാന്‍ കോടതി നോട്ടീസ് അയച്ചു. ക്രിമിനൽ നടപടിചട്ടം 164 വകുപ്പ് പ്രകാരം രഹസ്യമൊഴി നൽകാൻ നവംബര്‍ ഏഴിന് കോഴിക്കോട് ഫസ്റ്റ്ക്ലാസ് ജുസീഷ്യല്‍ കോടതിക്ക് മുമ്പാകെ ഹാജരാവാനാണ് ഷാജുവിന് നോട്ടീസ്.
കുന്നമംഗലം മജിസ്‌ട്രേറ്റ് കോടതിയാണ് ജോളിയുടെ മക്കളായ റെമോ, റെണാള്‍ഡ്, സിലിയുടെ സഹോദരന്‍ സിജോ എന്നിവരുടെ രഹസ്യമൊഴി രേഖപ്പെടുത്തുന്നത്. നവംബര്‍ ഒന്നിന് ജോളിയുടെ രണ്ടുമക്കളുടേയും രണ്ടിന് സിജോയുടെയും മൊഴികളാണ് രേഖപ്പെടുത്തുന്നത്.
റോയ് കൊലക്കേസില്‍ ഷാജുവിനെ മാപ്പുസാക്ഷിയാക്കാനാണ് അന്വേഷണസംഘത്തിന്‍റെ തീരുമാനമെന്നറിയുന്നു. റോയ് തോമസിനെ കൊലപ്പെടുത്തിയത് ജോളിയാണെന്നും അവര്‍ ഇത് തന്നോട് പറഞ്ഞിരുന്നതായും ഷാജു അന്വേഷണസംഘത്തിന് മൊഴിനല്‍കിയിരുന്നു. അന്ന് വീട്ടിലെ മുകള്‍നിലയില്‍ റെമോയും റോണാള്‍ഡും ഉറങ്ങിക്കിടക്കുന്നുണ്ടായിരുന്നു.
എന്നിട്ടും പിതാവ് റോയ് തോമസ് ബാത്ത് റൂമില്‍ രക്തം ഛര്‍ദിച്ച് അവശനായപ്പോൾ അയല്‍വീട്ടുകാരെയാണ് ജോളി വിവരമറിയിച്ചത്. പിറ്റേന്ന് മൃതദേഹം വീട്ടില്‍ എത്തിയപ്പോള്‍ മാത്രമാണ് മക്കള്‍ വിവരമറിഞ്ഞത്. വീട്ടില്‍ അത്യാഹിതം നടന്നിട്ടും മക്കളെ വിളിച്ചുണര്‍ത്താത്തതും തുടര്‍ന്നുള്ള ജോളിയുടെ നീക്കങ്ങളും സംശയാസ്പദമായിരുന്നുവെന്ന് മക്കളും അന്വേഷണസംഘത്തോട് വെളിപ്പെടുത്തിയിരുന്നു.
ജോളിയെ കാണാൻ ആരെല്ലാം വീട്ടിൽ എത്തിയിരുന്നതടക്കം വിവരങ്ങൾ മക്കൾ പോലീസിനോടു പറഞ്ഞിരുന്നു. ഈ സാഹചര്യത്തില്‍ ജോളിക്കെതിരേ നിര്‍ണായക തെളിവായി മാറിയേക്കാവുന്ന ഈ മൊഴികള്‍ കോടതിയില്‍ മാറ്റി പറയാതിരിക്കാനാണ് മജിസ്ട്രേറ്റിനുമുന്നില്‍ ഇവരെ എത്തിച്ച് രഹസ്യമൊഴി നല്‍കിപ്പിക്കാന്‍ അന്വേഷണസംഘം തയാറെടുക്കുന്നത്. കേസില്‍ നിര്‍ണായക മൊഴിയാണ് ഷാജുവും മക്കളും ജോളിക്കെതിരേ നല്‍കിയിരിക്കുന്നത്.
അന്വേഷണസംഘം ചോദ്യം ചെയ്യാന്‍ വിളിച്ചപ്പോള്‍ തന്നെ ഷാജു ഇക്കാര്യങ്ങള്‍ പോലീസിനോട് വിശദീകരിച്ചിരുന്നു. റോയ് മരിക്കുന്ന സമയത്ത് സുഹൃദ്ബന്ധം മാത്രമാണ് ഷാജുവുമായി ജോളിക്കുണ്ടായിരുന്നത്. റോയ് മരിച്ച് വര്‍ഷങ്ങള്‍ കഴിഞ്ഞ ശേഷമാണ് ഷാജുവിനെ ജോളി വിവാഹം കഴിക്കുന്നത്. വിവാഹശേഷം ജോളി ഷാജുവിനോട് പറഞ്ഞ കാര്യങ്ങളാണ് ഇപ്പോള്‍ അന്വേഷണസംഘത്തിന് പ്രധാന മൊഴിയായി മാറിയിരിക്കുന്നത്.
അതേസമയം ഷാജുവിന്റെ ആദ്യ ഭാര്യ സിലി, മകൾ ഒന്നരവയസുകാരി ആൽഫൈൻ എന്നിവർ കൊല്ലപ്പെട്ട കേസിലാണ് സിലിയുടെ സഹോദരൻ സിജോയുടെ രഹസ്യമൊഴിയെടുക്കുന്നത്. ജോളിക്കെതിരായി നിരവധി ശക്തമായ മൊഴികൾ സിജോ പോലീസിനു നൽകിയിരുന്നു.
