കോതമംഗലം: വൈദ്യപരിശോധനയ്ക്കിടെ എഎസ്ഐ ആക്രമിച്ച് രക്ഷപ്പെടാൻ ശ്രമിച്ച കഞ്ചാവ് കേസിലെ പ്രതിയെ നാട്ടുകാരും കോതമംഗലം പോലീസും ചേർന്ന് കീഴടക്കി.ഇന്നലെ രാത്രി 11 ന് കോതമംഗലം താലൂക്ക് ആശുപത്രിയിലാണ് സംഭവം. നെല്ലിക്കുഴി സ്വദേശി പാറക്കാട്ട് വീട്ടിൽ അമീർ (38) ആണ് പോലീസിനെ ആക്രമിച്ച് രക്ഷപ്പെടാൻ ശ്രമിച്ചത്.
കരിമുകൾ എഎസ്ഐ രമേശ് കുമാറിനാണ് ആക്രമണത്തിൽ പരിക്കേറ്റത്.
വാഹന പരിശോധനക്കിടെയാണ് രണ്ടു കിലോ കഞ്ചാവുമായി കരിമുകൾ പോലീസ് അമീറിനെ ഇന്നലെ രാത്രി അറസ്റ്റ് ചെയ്തത്.ഇയാളെ മെഡിക്കൽ പരിശോധനക്കായി കോതമംഗലം ആശുപത്രിയിലെത്തിച്ചപ്പോൾ ഡ്യൂട്ടി ഡോക്ടറുടെ റൂമിന്‍റെ മുന്നിൽ വെച്ച് എഎസ് ഐ യുടെ മുഖത്തിടിച്ച് ആശുപത്രി വളപ്പിൽ നിന്ന് ഓടി രക്ഷപ്പെടുകയായിരുന്നു.
ടൗണിലെ നൈറ്റ് കടയുടെ മുന്നിലൂടെ വിലങ്ങുമായി ഓടുന്ന പ്രതിയെ ചായ കുടിച്ചു കൊണ്ടിരുന്ന മൂവാറ്റുപുഴയിലെ സ്റ്റേഷനിലെ പോലീസുകാരനും സംഭവസ്ഥലത്ത് എത്തിയ കോതമംഗലം പോലീസും നാട്ടുകാരും ചേർന്ന് സാഹസികമായി കീഴടക്കുകയായിരുന്നു. പിടിയിലായ പ്രതിയെ ഇന്ന് കോടതിയിൽ ഹാജരാക്കും.
