തളിപ്പറമ്പ്: ബന്ധുക്കൾ കൂട്ടിക്കൊണ്ടുപോയ സുഹൃത്തിനെ തേടിയെത്തിയ ട്രാൻസ്ജെൻഡർ സുഹൃത്‌സംഘം തളിപ്പറമ്പ് പോലിസ് സ്റ്റേഷന് മുന്നിൽ സത്യഗ്രഹസമരം നടത്തിയത് പോലീസുകാരെ ഞെട്ടിച്ചു. ഇന്നലെ രാത്രി പതിനൊന്നോടെയായിരുന്നു സംഭവം.
തളിപ്പറമ്പിനടുത്തുള്ള ഒരു സ്ഥലത്ത് ബന്ധുക്കളുടെ കൂടെ താമസിക്കുന്ന യുവതി കണ്ണൂരിലെ ട്രാൻസ്ജെൻഡർ സംഘത്തിന്‍റെ സുഹൃത്താണ്. കുറച്ചുദിവസമായി യുവതിയെ കാണാതെ വന്നതോടെ സംഘം അന്വേഷിച്ച് ബന്ധുവീട്ടിലെത്തി.
അച്ഛനമ്മമാർ കൂട്ടിക്കൊണ്ടുപോയെന്ന് അറിഞ്ഞതോടെയാണ് ഇവർ തളിപ്പറമ്പ് പോലീസ് സ്റ്റേഷനിലെത്തിയത്.കൂട്ടുകാരിയെ കണ്ടെത്താൻ സഹായം നൽകണമെന്ന് ആവശ്യപ്പെട്ട സംഘം ഒടുവിൽ പ്രകോപിതരായി അരമണിക്കൂറോളം സ്റ്റേഷനിൽ കുത്തിയിരിപ്പ് സമരം നടത്തി. ഒടുവിൽ പോലീസ് ഇവരെ അനുനയിപ്പിച്ച് പറഞ്ഞയയ്ക്കുകയായിരുന്നു.
