ന്യൂഡൽഹി: മരണവൈറസ് കൊറോണയുടെ പ്രഭവകേന്ദ്രമായ ചൈനയിലെ വുഹാനിൽനിന്നുള്ള മലയാളി വിദ്യാർഥികൾ ഉൾപ്പെടെ 324 ഇന്ത്യക്കാരുമായി എയർ ഇന്ത്യയുടെ പ്രത്യേക വിമാനം ഇന്നു ഡൽഹിയിലെത്തി. ഇവർക്കായി നിശ്ചയിച്ചിട്ടുള്ള 14 ദിവസത്തെ നിരീക്ഷണ കാലയളവിൽ താമസിക്കുന്നതിനായി ഡൽഹിക്കടുത്ത് ഹരിയാനയിലെ മനേസറിൽ കരസേന പ്രത്യേക ക്യാന്പ് സജ്ജീകരിച്ചു.
ക്യാന്പ് തയാർ
മുന്നൂറ്റന്പതോളം പേർക്ക് താമസിക്കാവുന്നതും ഡോക്ടർമാരടക്കം വിദഗ്ധരുടെ സേവനമുള്ളതുമായ ക്യാന്പുകളാണിത്. വിദ്യാർഥികൾക്കു പുറമേ ചൈനയിൽനിന്നെത്തുന്ന മറ്റ് ഇന്ത്യക്കാരായ കുടുംബങ്ങൾക്കു താമസിക്കാൻ തെക്കുപടിഞ്ഞാറൻ ഡൽഹിയിൽ ചാവ്‌ലയിൽ 600 പേർക്ക് താമസിക്കാവുന്ന പ്രത്യേക ക്യാന്പ് ഇന്തോ-ടിബറ്റൻ പോലീസും തയാറാക്കിയിട്ടുണ്ട്. ഇവിടെ സ്ത്രീകൾക്കും കുട്ടികൾക്കുമായി പ്രത്യേക സജ്ജീകരണങ്ങളുമുണ്ട്.
ചൈനയിലെ ഹുബേയ് പ്രവശ്യയിലുള്ള വുഹാനിലെ വിദ്യാർഥികളെല്ലാവരും ഇന്നു ഡൽഹിയിലെത്തുമെന്ന് എയർ ഇന്ത്യയുടെ പ്രത്യേക വിമാനത്തിൽ വരുന്ന വിദ്യാർഥി തനിഷ്ക് നന്ദ പറഞ്ഞു. വുഹാനു പുറത്തുള്ള ഇന്ത്യൻ വിദ്യാർഥികളെയും രണ്ടാം ഘട്ടത്തിൽ ഇന്നുതന്നെ എത്തിച്ചേക്കുമെന്നും തനിഷ്ക് പറഞ്ഞു. ഡൽഹി സ്വദേശിയാണ് തനിഷ്ക് നന്ദ.
വുഹാനിൽനിന്നു വിദ്യാർഥികളെ തിരിച്ചെത്തിക്കാൻ എയർ ഇന്ത്യയുടെ ജംബോ 747 വിമാനം ഇന്നലെ ഉച്ചയ്ക്ക് 12.30നു ചൈനയിലേക്കു തിരിച്ചു. ആറു മണിക്കൂർ യാത്രയ്ക്കുശേഷം വുഹാനിൽ രണ്ടോ മൂന്നോ മണിക്കൂർ തങ്ങി ഇന്നു പുലർച്ചെ രണ്ടിന് ഡൽഹിയിലേക്കു തിരിക്കുമെന്നാണു വിവരം.
മെഡിക്കൽ സംഘം
ഡൽഹി റാം മനോഹർ ലോഹ്യ ആശുപത്രിയിൽനിന്നുള്ള അഞ്ചു ഡോക്ടർമാരും കേരളത്തിൽ നിപ്പ വൈറസ് ബാധ കൈകാര്യം ചെയ്തു പരിചയമുള്ള രണ്ടു മലയാളി നഴ്സുമാരും എയർ ഇന്ത്യ പാരാമെഡിക്കൽ സംഘവുമാണു വിമാനത്തിലുള്ളത്. മലയാളി നഴ്സുമാരെ കേന്ദ്ര ആരോഗ്യ മന്ത്രാലയം പ്രത്യേകം വിളിച്ചുവരുത്തിയതാണ്.
മനേസറിലെ ക്യാന്പിൽ കഴിയുന്നതിനിടയ്ക്ക് രോഗ ലക്ഷണങ്ങൾ പ്രകടിപ്പിക്കുന്നവരെ കന്‍റോണ്‍മെന്‍റിലെ ആർമി ബേസ് ആശുപത്രിയിലേക്കു മാറ്റും. പിന്നീട് രണ്ടു തവണ സാന്പിൾ പരിശോധനയിൽ നെഗറ്റീവ് ഫലം കണ്ടെത്തിയാൽ മാത്രമേ ഇവരെ ആശുപത്രി വിടാൻ അനുവദിക്കൂ.
ക്യാന്പിൽ കഴിയുന്നവരെല്ലാം തന്നെ മൂന്നു പാളികളുള്ള മാസ്ക് ധരിക്കണം. ഇവർക്ക് പ്രതിദിന വൈദ്യപരിശോധന ഉണ്ടായിരിക്കും. 14 ദിവസത്തിനുശേഷം രോഗ ലക്ഷണങ്ങൾ ഒന്നും തന്നെ പ്രകടിപ്പിച്ചില്ല എങ്കിൽ ഇവരെ സ്വന്തം വീടുകളിലേക്ക് വിടും. വീടുകളിൽ എത്തിയാലും അതതു സംസ്ഥാനങ്ങളിൽ ജില്ലാ ആരോഗ്യ കേന്ദ്രങ്ങളുടെ നിരീക്ഷണത്തിലായിരിക്കും ഇവർ.
മനേസറിൽ സൈനിക ബാരക്കുകളുടെ മാതൃകയിലാണ് ക്യാന്പ് തയാറാക്കിയിരിക്കുന്നത്. ഒാരോ ബാരക്കിലും 50 വിദ്യാർഥികൾ വീതം ഉണ്ടായിരിക്കും. വിദഗ്ധ മെഡിക്കൽ സംഘത്തെ അല്ലാതെ സൈനികരെയോ സാധാരണക്കാരെയോ ക്യാന്പിൽ പ്രവേശിപ്പിക്കില്ല.
സെബി മാത്യു
