പേരൂർക്കട: പോക്സോ കേസുമായി ബന്ധപ്പെട്ട് യുവാവിനെ പൂജപ്പുര പോലീസ് അറസ്റ്റ് ചെയ്തു. മണക്കാട് കാലടി മരുതൂര്‍ക്കടവ് ശബരി ലെയിന്‍ ശ്രീലക്ഷ്മിയില്‍ അരുണ്‍ (21) ആണ് പിടിയിലായത്.
വിവിധ കാലങ്ങളിലായി 12 ഓളം സ്കൂൾ കുട്ടികളായ പെണ്‍കുട്ടികളെയാണ് ഇയാള്‍ പീഡിപ്പിച്ചുവന്നത്. ഫെയ്‌സ്ബുക്കിലൂടെ റിക്വസ്റ്റ് അയച്ച് പെണ്‍കുട്ടികളെ വശീകരിച്ചശേഷം ഇവരെ പീഡിപ്പിക്കുകയും ആഭരണങ്ങള്‍ കൈക്കലാക്കുകയുമാണ് ഇയാളുടെ രീതി.
ഫോര്‍ട്ട്, കുടപ്പനക്കുന്ന്, നേമം തുടങ്ങിയ സ്ഥലങ്ങളില്‍ താമസിക്കുന്ന പ്രായപൂര്‍ത്തിയാകാത്ത പെണ്‍കുട്ടികളാണ് ഇയാളുടെ ഇരയായിരുന്നത്.
പൂജപ്പുര സ്റ്റേഷന്‍ പരിധിയില്‍ താമസിച്ചു വരുന്ന ഒരു പെണ്‍കുട്ടിയുടെ രക്ഷിതാക്കള്‍ നല്‍കിയ പരാതിയുടെ അടിസ്ഥാനത്തില്‍ നടത്തിയ അന്വേഷണത്തിലാണ് പ്രതി പിടിയിലായത്. അന്വേഷണവുമായി ബന്ധപ്പെട്ട് യുവാവിന്‍റെ മൊബൈൽ ഫോണും പോലീസ് കണ്ടെത്തി.
