കോഴിക്കോട്: നഗര പരിധിയിലെ ട്രാഫിക് നിയമ ലംഘനങ്ങളുമായി ബന്ധപ്പെട്ട് ഒരു വര്‍ഷത്തിനുള്ളില്‍ വാട്‌സ് ആപ്പ് വഴി ഖജനാവില്‍ എത്തിയത് 12 ലക്ഷം രൂപ.
പൊതുജനത്തെ അണിനരിത്തി സിറ്റി പോലീസ് ആവിഷ്‌കരിച്ച സിസി വിജില്‍ പദ്ധതിയിലൂടെയാണ് പിഴയിനത്തില്‍ 18000ത്തോളം നിയമ ലംഘനങ്ങളിലായി ഇത്രയും തുക ഖജനാവില്‍ എത്തിയത്.
അനധികൃത വാഹന പാര്‍ക്കിംഗ്, ഹെല്‍മറ്റില്ലാതെയുള്ള ബൈക്ക് യാത്ര, സ്വകാര്യ ബസുകളുടെ നിയമ ലംഘനങ്ങള്‍, മൊബൈലില്‍ സംസാരിച്ചുള്ള ഡ്രൈവിംഗ്, വാഹനങ്ങള്‍ നിയമവിരുദ്ധമായി രൂപമാറ്റംവരുത്തല്‍ എന്നിവയാണ് കൂടുതലായി പിടിക്കപ്പെട്ടത്.
വാഹനാപകടങ്ങള്‍ വര്‍ധിച്ച പശ്ചാത്തലത്തില്‍ നഗര റോഡുകള്‍ കൂടുതല്‍ സുരക്ഷിതമാക്കുക ലക്ഷ്യമിട്ട് 2019 ഫെബ്രുവരി 15നാണ് പദ്ധതി ആരംഭിച്ചത്.
പൊതുജനങ്ങളുടെ ശ്രദ്ധയില്‍പ്പെടുന്ന ട്രാഫിക് നിയമ ലംഘനങ്ങള്‍ മൊബൈലില്‍ പകര്‍ത്തി 6238488686 എന്ന വാട്‌സ് ആപ്പ് നമ്പറിലേക്ക് സ്ഥലം, തീയതി, സമയം, വാഹനത്തിന്‍റെ നമ്പര്‍ എന്നിവ സഹിതം അയക്കാനുള്ള സൗകര്യമൊരുക്കിയാണ് പോലീസ് പദ്ധതി നടപ്പാക്കിയത്.
നിയമ ലംഘനം സംബന്ധിച്ച ഫേട്ടോ അയക്കുന്നവരുടെ പേരുവിവരം രഹസ്യമായി സൂക്ഷിക്കുമെന്നും എന്ത് നടപടിയെടുത്തു എന്ന് ബന്ധപ്പെട്ടവര്‍ക്ക് അറിയാന്‍ അവസരമുണ്ടാകുമെന്നും പ്രഖ്യാപിച്ചതോടെയാണ് പദ്ധതി ഹിറ്റായി.
നിലവില്‍ ദിവസേന നൂറിലേറെ പരാതികളാണ് പോലീസിന്‍റെ വാട്‌സ്ആപ്പില്‍ ലഭിക്കുന്നത്. ലഭിക്കുന്ന പരാതികളില്‍ ചിലതില്‍ വിശദാംശങ്ങള്‍ ഇല്ലാത്തതിനാല്‍ നിയമനടപടി സ്വീകരിക്കുന്നതിന് പരിമിതികളുണ്ടെന്നും പൂര്‍ണവിവരങ്ങള്‍ സഹിതമുള്ളവയില്‍ നടപടിയെടുക്കുന്നതായും ഉദ്യോഗസ്ഥര് അറിയിച്ചു.
ഫേട്ടോ ലഭിച്ചാലുടന്‍ വാഹനത്തിന്‍റെ നമ്പര്‍ നോക്കി ഉടമയുടെ ഫോണ്‍ നമ്പറില്‍ ബന്ധപ്പെട്ട് സിറ്റി ട്രാഫിക് യൂണിറ്റിലെ സിസി വിജില്‍ ഓഫിസില്‍ വന്ന് നിശ്ചിത ദിവസത്തിനകം പിഴയടക്കാന്‍ നിര്‍ദ്ദേശിക്കുകയാണ് ചെയ്യുന്നത്.
ഫോണ്‍ നമ്പര്‍ ലഭ്യമല്ലെങ്കില്‍ നേരിട്ട് നോട്ടീസ് അയയ്ക്കും. പിഴയടച്ചില്ലെങ്കില്‍ കോടതിക്ക് കേസ് കൈമാറും. പിഴയടപ്പിക്കുന്നതോടൊപ്പം ബോധവത്കരണ ക്ലാസും ‘ശിക്ഷ’യായി നല്‍കുന്നുണ്ട്.
