അമ്പലപ്പുഴ: മദ്യലഹരിയിൽ കെഎസ്ആർടിസി ബസ് ഓടിച്ച ഡ്രൈവർ പിടിയിൽ. തിരുവല്ല ഡിപ്പോയിലെ ഡ്രൈവർ കറുകച്ചാൽ കങ്ങഴ പാറയ്ക്കൽ രവീന്ദ്രൻനെ (54) യാണ് പുന്നപ്ര പോലീസ് കസ്റ്റഡിയിലെടുത്തത്.
ഇന്നലെ വൈകുന്നേരം 5.30 ഓടെ പറവൂരിൽ വച്ചാണ് സംഭവം. തിരുവല്ലയിൽ നിന്ന് ആലപ്പുഴയിൽ വന്നതിനുശേഷം തെങ്കാശിയിലേക്കു ദീർഘദൂര സർവീസ് നടത്തുകയായിരുന്നു.
ബൈക്കിൽ തട്ടിയിട്ടും നിർത്താതെ പോയതിനെ തുടർന്നു നാട്ടുകാരാണു പോലീസിനെ അറിയിച്ചത്.
പുന്നപ്ര സ്റ്റേഷനു മുന്നിൽ ബസ് തടഞ്ഞു നിർത്തുകയായിരുന്നു. യാത്രക്കാരെ മറ്റു ബസിൽ കയറ്റി വിട്ടതിനു ശേഷം ഡ്രൈവറെ വൈദ്യ പരിശോധനയ്ക്കു വിധേയമാക്കി.
ഇതിനുമുമ്പ് ഇയാൾ ഓടിച്ചിരുന്ന ബസ് ബൈക്കിലിടിച്ചു മാതാപിതാക്കളോടൊപ്പം സഞ്ചരിച്ചിരുന്ന കുട്ടി മരിച്ചതായി പോലീസ് പറഞ്ഞു.
