കല്ലറ: അങ്കണവാടിക്കു സമീപം അജ്ഞാതനെ കണ്ടത് പരിഭ്രാന്തി പരത്തി. തിങ്കളാഴ്ച രാവിലെ ഒന്പതരയോടെ കല്ലറ കളന്പുകാട് ആണ് സംഭവം.
സമീപവാസിയായ വീട്ടമ്മ കുട്ടിയുമായി അങ്കണവാടിയിലേക്കു പോകുന്ന വഴി റോഡരികിൽ അപരിചിതനെ കണ്ടു. അജ്ഞാതനായ അപരിചിതനെ കണ്ട് ഭയപ്പെട്ട് ഇവർ പ്രധാന റോഡിൽനിന്നും അൽപ്പം കയറി സ്ഥിതി ചെയ്യുന്ന അങ്കണവാടിയിലേക്കു വേഗം പോകുകയും ചെയ്തു.
ഇതിനുശേഷം പതിനൊന്ന് മണിയോടെ ഈ അപരിചിതൻ അങ്കണനവാടിക്കു സമീപമുള്ള വീട്ടിലെത്തിവീട്ടമ്മയോട് ചോറ് ആവശ്യപ്പെട്ടു. ചോറില്ലെന്ന് അറിയിച്ചതോടെ എന്നാൽ തുണി വല്ലതുമുണ്ടെങ്കിൽ തന്നാൽ മതിയെന്ന് പറഞ്ഞു.
ഭയപ്പെട്ട് വീടിനുള്ളിലേക്കു കയറിയ വീട്ടമ്മ ഇയാളോട് ഇറങ്ങിപ്പോകാൻ ആവശ്യപ്പെട്ടെങ്കിലും അജ്ഞാതൻ പോകാൻ തയാറായില്ല.
ഈ സമയം ഇവർ ബഹളം വച്ചതിനെ തുടർന്ന് ഇയാൾ ഫോണ് ചെയ്തുകൊണ്ട് പുറത്തേക്ക് പോകുകയും നിമിഷങ്ങൾക്കകം റോഡിൽ വന്ന നിന്ന നീല ഓമനി വാനിൽ കയറി കോട്ടയം ഭാഗത്തേക്കു പോകുകയായിരുന്നു. ഈ സംഭവം വീട്ടമ്മ പരിസരവാസികളേയും അങ്കണവാടി ടീച്ചറെയും അറിയിച്ചു.
അജ്ഞാതന്‍റെ സാന്നിധ്യം അങ്കണവാടിക്ക് സമീപം കണ്ടതിനെ തുടർന്ന് അങ്കണവാടി ടീച്ചർ പി.ടി. ഷൈനി പോലീസിൽ പരാതി നൽകി.
