കോഴിക്കോട്: മെഡിക്കൽ കോളജിൽ കോവിഡ് രോഗികളെ പരിചരിക്കുന്ന ആരോഗ്യ പ്രവർത്തകർക്കും രോഗികൾക്കും കൂട്ടിരിപ്പുകാർക്കും ഭക്ഷണമൊരുക്കുന്ന അടുക്കളയിൽ നാടൻ കാർഷിക ഉത്പന്നങ്ങൾ എത്തിച്ചു നൽകി സർക്കാർ ജീവനക്കാരന്‌.
ഫയർ ആൻഡ് റെസ്ക്യൂ കോഴിക്കോട് ജില്ലാ ഓഫീസിലെ മിനിസ്റ്റീരിയൽ ജീവനക്കാരൻ പ്രേംനാഥ് മംഗലശേരിയാണ് സ്വന്തം പറമ്പിൽ നിന്ന് വിളവെടുത്ത ഉത്പന്നങ്ങൾ എത്തിച്ചു നൽകിയത്. എൻജിഒ അസോസിയേഷൻ കോഴിക്കോട് ജില്ലാ സെക്രട്ടറി കൂടിയാണ് പ്രേംനാഥ് മംഗലശേരി.
മെഡിക്കൽ കോളജിൽ താമസിച്ച് കൊറോണ പ്രതിരോധ പ്രവർത്തനങ്ങളിൽ മുഴുകുന്ന നഴ്സുമാരും മറ്റ് ജീവനക്കാരും ക്വാറന്‍റൈന് വിധേയരാകുന്ന ആരോഗ്യ പ്രവർത്തകരും ഐസലേഷനിൽ കഴിയുന്ന രോഗികളും അവരുടെ ബന്ധുക്കളുമടക്കം 200 പേർക്കാണ് നിത്യേനഭക്ഷണവും വൈകിട്ട് ചായയും നൽകുന്നത്.
പാകമായ വരിക്കച്ചക്കകൾ, നാടൻ പച്ചമാങ്ങ, ചേന, നേന്ത്രക്കുല, പഴം, തേങ്ങ ,വാഴയില എന്നിവയെല്ലാമാണ് ഒരു ഗുഡ്സ് നിറയെ പ്രേംനാഥ് മംഗലശേരി എത്തിച്ചു നൽകിയത്.
കാർഷികവിഭവങ്ങൾ മെഡിക്കൽ കോളജ് പ്രിൻസിപ്പൽ ഡ. വി.ആർ രാജേന്ദ്രൻ ഏറ്റുവാങ്ങി. എൻജിഒ. അസോസിയേഷൻ മെഡിക്കൽ കോളജ് ബ്രാഞ്ച് പ്രസിഡന്‍റ് കെ.പി. കൃഷ്ണൻ, സെക്രട്ടറി യു.എസ്.വിഷാൽ തുടങ്ങിയവർ സംബന്ധിച്ചു.
