പെരിങ്ങോട്ടുകര: ആംബുലൻസ് മറിഞ്ഞുണ്ടായ അപകടത്തിൽ മരിച്ച നഴ്സ് ഡോണ ( 23 ) യ്ക്കു കണ്ണീരിൽ കുതിർന്ന യാത്രാമൊഴി. അന്തിക്കാട് ഗവ. ആശുപത്രിയിലെ 108 ആംബുലൻസിലെ നഴ്സായ പെരിങ്ങോട്ടുകര താണിക്കൽ ചമ്മണത്ത് വീട്ടിൽ വർഗീസിന്‍റെ മകൾ ഡോണ തിങ്കളാഴ്്ച വൈകീട്ട് അന്തിക്കാട് ആൽ പരിസരത്തു വച്ചുണ്ടായ അപകടത്തിലാണ് മരിച്ചത്.
പോസ്റ്റ്മോർട്ടത്തിനുശേഷം മൃതദേഹം അന്തിക്കാട് ഗവ. ആശുപത്രിയിൽ പൊതു ദർശനത്തിനു വച്ചു. നിരവധി പേരാണ് സാമൂഹിക അകലം പാലിച്ച് ഡോണയെ അവസാനമായി കാണാനെത്തിയത്.
മന്ത്രി വി.എസ്. സുനിൽകുമാർ, ചീഫ് വിപ്പ് കെ. രാജൻ, അന്തിക്കാട് ബ്ലോക്ക് പഞ്ചായത്ത് പ്രസിഡന്‍റ് പി.സി. ശ്രീദേവി എന്നിവർ ആശുപത്രിയിൽ എത്തി ആദരാഞ്ജലി അർപ്പിച്ചു.
തുടർന്ന് പത്ത് ആംബുലൻസുകളുടെ അകന്പടിയോടെ മൃതദേഹം പെരിങ്ങോട്ടുകരയിലുള്ള വസതിയിലെത്തിച്ചു. ജില്ലാ കളക്ടർ എസ്. ഷാനവാസ്, ടി.എൻ. പ്രതാപൻ എംപി, ഗീത ഗോപി എംഎൽഎ, ബിജെപി സംസ്ഥാന സെക്രട്ടറി എ. നാഗേഷ് തുടങ്ങിയവർ വീട്ടിലെത്തി ഡോണക്ക് അന്തിമോപചാരമർപ്പിച്ചു.
ഇടവക വികാരി ഫാ. ടോണി റോസ് വാഴപ്പിള്ളി, ഫാ. തോമസ് വടക്കേത്തല, ഫാ. ഡേവീസ് ചിറമ്മൽ, ഫാ. റെന്നി മുണ്ടൻ കുര്യൻ തുടങ്ങിയവർ സംസ്കാര ചടങ്ങുകൾക്കു കാർമികനായി. തുടർന്ന് പെരിങ്ങോട്ടുകര സെന്‍റ്.മേരീസ് ദേവാലയത്തിൽ സംസ്കാരം നടത്തി.
