കോല്‍ക്കത്ത: സൂപ്പര്‍ സൈക്ലോണ്‍ ഉംപുന്‍ ശക്തി ക്ഷയിച്ച് അതിതീവ്ര ചുഴലിക്കാറ്റായി തീരത്തേക്ക് എത്തുന്നു. ചൊവ്വാഴ്ച ഉച്ചയോടെ പശ്ചിമബംഗാൾ തീരത്ത് എത്തും. ബുധനാഴ്ച ഉച്ചയോടെ പശ്ചിമബംഗാളിലെ ദിഗ, ബംഗ്ലാദേശിലെ ഹതിയ ദ്വീപ് എന്നിവിടങ്ങളിലൂടെയാണ് ഉംപുന്‍ തീരം തൊടുന്നത്. മണിക്കൂറില്‍ 155 കിലോമീറ്റര്‍ മുതല്‍ 165 കിലോമീറ്റര്‍ വരെയാകും കാറ്റിന്‍റെ വേഗം.
ബംഗാളിന്‍റെയും ഒഡീഷയുടേയും തീരമേഖലകളിൽ കനത്ത കാറ്റും മഴയുമാണ്. മണിക്കൂറിൽ 100 കിലോമീറ്റർ വരെ വേഗത്തിലാണ് കാറ്റ് വീശുന്നത്.
പതിനാറടി ഉയരത്തിൽവരെ തിരമാലകളുണ്ടാവുമെന്നാണ് മുന്നറിയിപ്പ്. ഒഡീഷയിൽ 1704 ക്യാമ്പുകളിലായി 119075 പേരെ മാറ്റിപ്പാർപ്പിച്ചു. പശ്ചിമ ബംഗാളിൽ നാലുലക്ഷത്തോളം പേരെ മാറ്റിപ്പാർപ്പിച്ചു.
ഒഡീഷയിലെ പാരദ്വീപില്‍നിന്ന് 360 കിലോമീറ്റര്‍ തെക്കും പശ്ചിമബംഗാളിലെ ദിഗയില്‍നിന്ന് 510 കിലോമീറ്റര്‍ തെക്കു പടിഞ്ഞാറുമായി ബംഗാള്‍ ഉള്‍ക്കടലിന്‍റെ മധ്യ-പടിഞ്ഞാറ് ഭാഗത്താണ് കാറ്റിന്‍റെ സ്ഥാനം. വടക്കുനിന്ന് വടക്കുകിഴക്കന്‍ ദിശയിലേക്ക് ചുഴലിക്കാറ്റ് നീങ്ങുന്നതായും കാലാവസ്ഥാ നിരീക്ഷണ കേന്ദ്രം അ റിയിച്ചു.
ബംഗാളില്‍ തീരദേശ ജില്ലകളായ നോര്‍ത്ത്, സൗത്ത് 24 പര്‍ഗനാസ്, ഈസ്റ്റ് മിഡ്‌നാപുര്‍ ജില്ലകളിലും സുന്ദര്‍ബനിലുമാണ് ഉംപുന്‍ കൂടുതല്‍ നാശം വിതയ്ക്കുക.
കഴിഞ്ഞ വര്‍ഷമുണ്ടായ ഫാനി, ബുള്‍ബുള്‍ ചുഴലിക്കാറ്റുകളെ സംസ്ഥാനം നേരിട്ട പരിചയം ഉംപുനെയും നേരിടാന്‍ സഹായിക്കുമെന്ന് പശ്ചിമബംഗാള്‍ ദുരന്ത നിവാരണ മന്ത്രി ജാവേദ് ഖാന്‍ പറഞ്ഞു. കോവിഡ്-190 നെത്തുടര്‍ന്ന് ദുരിതാശ്വാസ പ്രവര്‍ത്തകര്‍ക്ക് ആവശ്യമായ മാസ്‌ക്കുകളും പിപിഇ കിറ്റുകളും വിത രണം ചെയ്തിട്ടുണ്ട്.
ഉംപുന്‍ തീരത്തോട് അടുക്കുന്നതിനാല്‍ ഒഡീഷയിലെ പുരി, കേന്ദ്രപാറ, ജഗത്സിംഗ്പുര്‍, കുര്‍ദ ജില്ലകളില്‍ ഇന്നലെ കാറ്റും മഴയുമുണ്ടായി. ഒഡീഷയിലെ തീരമേ ഖലയിലെ ജില്ലകളായ ജഗത്സിംഗ്പുര്‍, കേന്ദ്രപാറ, ബാദ്രാഗ്, ബാലസോര്‍ എന്നിവിടങ്ങളില്‍ കനത്തമഴയും കാറ്റുമുണ്ടാകും. ദേശീയ ദുരന്ത നിവാരണ സേനയുടെ 14 അംഗ സംഘത്തെയും ഒഡീഷ ദുരന്തനിവാരണ സേനയുടെ 20 യൂണിറ്റിനെയും ഈ ജില്ലകളില്‍ വിന്യസിച്ചിട്ടുണ്ട്.
