പയ്യന്നൂര്‍: ഓരോ പ്രഭാതത്തിലും പത്രങ്ങള്‍ക്കൊപ്പം മണിക്കൂറുകള്‍ ചെലവഴിക്കുന്ന അശ്വന്ത് രാജിന് ഹയര്‍ സെക്കൻഡറി പരീക്ഷയില്‍ എല്ലാ വിഷയങ്ങള്‍ക്കും എ പ്ലസ്.
ദീപിക,രാഷ്‌ട്രദീപിക പത്രങ്ങൾ ഉള്‍പ്പെടെയുള്ളവയുടെ പയ്യന്നൂര്‍ ഏജന്‍റ് സുബ്രഹ്മണ്യ സ്വാമി ക്ഷേത്രത്തിന് സമീപത്തെ എ.യു. രാജു- ഇ. ശ്രീലേഖ ദന്പതികളുടെ മകനായ ഇ.അശ്വന്ത് രാജാണ് മികച്ച നേട്ടം കൈപ്പിടിയിലൊതുക്കിയത്.
പത്രഏജന്‍റായ പിതാവിനെ സഹായിക്കാന്‍ പുലര്‍ച്ചെ നാലരയോടെ പയ്യന്നൂര്‍ പഴയ ബസ് സ്റ്റാൻഡിലെത്തുന്ന അശ്വന്ത് ഇവിടെയെത്തുന്ന യാത്രക്കാര്‍ക്ക് സുപരിചിതനാണ്.
പത്രങ്ങള്‍ നിരത്തി അതിന് പിന്നിലാണ് ഇരിപ്പ്. പത്രങ്ങള്‍ ആവശ്യപ്പെട്ടുവരുന്നവര്‍ക്ക് അത് നല്‍കി പൈസ വാങ്ങുമ്പോഴും കണ്ണുകള്‍ മുന്നില്‍ തുറന്നുവെച്ച പാഠഭാഗങ്ങളിലൂടെ സഞ്ചരിക്കുകയായിരിക്കും.
രാവിലെ അഞ്ചര മുതല്‍ എട്ടരവരെ ബസ് സ്റ്റാൻഡിലെത്തുന്നവരുടെ പതിവുകാഴ്ചയാണിത്. നഗരത്തിലും പരിസരങ്ങളിലും പത്രവിതരണം നടത്തി പിതാവ് രാജു തിരിച്ചെത്തുംവരെ സഹായിക്കാന്‍ അശ്വന്തും ഉണ്ടാകും.
കണ്ടങ്കാളി ഷേണായി സ്മാരക ഗവ. ഹയര്‍സെക്കന്‍ഡറി സ്‌കൂളിലെ സയന്‍സ് വിഭാഗം വിദ്യാര്‍ഥിയാണ് അശ്വന്ത് രാജ്.
