ബംഗളൂരു: ലഹരിമരുന്നു കേസില്‍ സെന്‍ട്രല്‍ ക്രൈം ബ്രാഞ്ച് അറസ്റ്റു ചെയ്ത നടന്‍ നിയാസ് മുഹമ്മദ് മലയാള സിനിമയുമായി അടുത്ത ബന്ധം. നിരവധി സിനിമകളിൽ പ്രധാന്യമുള്ളതും അല്ലാത്തതുമായി നിരവധി വേഷങ്ങൾ നിയാസ് ചെയ്തിട്ടുണ്ട്. ടൊവിനോ നായകനായ കൽക്കി, ആദ്യരാത്രി തുടങ്ങിയ സിനിമകളിൽ നിയാസ് അഭിനയിച്ചിട്ടുണ്ട്.
സിനിമകളില്‍ കാര്യമായ വേഷം ലഭിച്ചിരുന്നില്ലെങ്കിലും സിനിമാക്കാരുടെ അടുപ്പക്കാരനും ഇവര്‍ക്കു ലഹരി എത്തിക്കുന്നതില്‍ മുന്‍പന്തിയിലുമായിരുന്നു നിയാസ് എന്നാണു പുറത്തു വരുന്ന റിപ്പോര്‍ട്ടുകള്‍. മലയാളത്തിലെ പല താരങ്ങൾക്കൊപ്പമുള്ള ചിത്രങ്ങളും നിയാസ് സോഷ്യൽ മീഡിയയിൽ പങ്കുവച്ചിട്ടുണ്ട്.
മദ്യം സൗജന്യം
ഫാഷന്‍ ഷോകളും ഡിജെ പാർട്ടികളും നടത്തുന്ന കന്പനിയും നിയസിനുണ്ടെന്നാണ് റിപ്പോർട്ട്. ബംഘളൂരു കേന്ദ്രീകരിച്ചാണ് പാർട്ടികൾ കൂടുതലും നടത്തിയിരുന്നത്.
പാർട്ടികളിൽ പങ്കെടുക്കുന്ന പെൺകുട്ടികൾക്ക് മദ്യം സൗജന്യമാണെന്ന് പ്രത്യേകം പരസ്യങ്ങളില്‌ പറയുന്നുണ്ട്. പെൺകുട്ടികളടക്കം നിരവധി പേരാണ് ഈ പാർട്ടികളിൽ പങ്കെടുക്കാനെത്തിയിരുന്നത്.
പാർട്ടികളുടെ ചിത്രങ്ങളും വീഡിയോയും സോഷ്യൽ മീഡിയയിൽ പങ്കുവച്ചിട്ടുമുണ്ട്. ഇത്തരത്തിൽ കേരളത്തിലും നിയാസ് പാർട്ടികൾ നടത്തിയതായി പറയപ്പെടുന്നുണ്ട്.
സ്വർണക്കടത്ത് കേസിൽ മുൻ ഐടി സെക്രട്ടറി ശിവശങ്കരൻ നൽകിയ സ്വപ്നക്കെതിരായ മൊഴിയിൽ തിരുവനന്തപുരത്ത് നടത്തിയ പാർട്ടികളിൽ മദ്യം സൗജന്യമായി വിതരണം നടത്തിയെന്ന് പറഞ്ഞിരുന്നു. ഈ മദ്യത്തിൽ ആളുകൾ അറിയാതെ ലഹരി ചേർത്തിട്ടുണ്ടായിരുന്നെന്നും പരാമർശമുണ്ടായിരുന്നു.
നിയാസ് നടത്തിയ പാർട്ടികളിലും പെൺകുട്ടികൾക്ക് സൗജന്യമായി നൽകുന്ന മദ്യത്തിൽ ലഹരി ചേർത്തിട്ടുണ്ടാവാമെന്ന നിഗമനത്തിലാണ് സെൻട്രൽ ക്രൈംബ്രാഞ്ച്. പാർട്ടികൾ, ഫാഷന്‍ ഷോകൾ, സിനിമാ സെറ്റുകള്‍ തുടങ്ങിയ ഇടങ്ങളിലെല്ലാം നിയാസ് ലഹരി ഇടപാട് നടത്തിയിരുന്നതായാണ് അന്വേഷണ സംഘം കണ്ടെത്തിയിരിക്കുന്നത്.
സഞ്ജന അടുത്ത സുഹൃത്ത്
കഴിഞ്ഞ ദിവസം അറസ്റ്റ് ചെയ്യപ്പെട്ട നടി സഞ്ജന ഗൽറാണിയുമായി നിയാസിന് വളരെ അടുത്ത സൗഹൃദമാണുള്ളത്. നിയാസ് സഞ്ജന ഗല്‍റാണിയുടെ അടുത്ത സുഹൃത്താണെന്നു വ്യക്തമാക്കുന്ന നിരവധി ചിത്രങ്ങളും വീഡിയോകളും സമൂഹമാധ്യമങ്ങളില്‍ പങ്കുവച്ചിട്ടുണ്ട്.
സഞ്ജനയ്‌ക്കൊപ്പം നിരവധി പാര്‍ട്ടികളിലും മറ്റും പങ്കെടുക്കുന്നതിന്‍റെ ചിത്രങ്ങളും സിസിബിക്കു ലഭിച്ചിരുന്നു. നിയാസ് നടത്തുന്ന പാർട്ടികളിലും സഞ്ജനയുടെ സാന്നിധ്യമുണ്ടായിരുന്നു.
സഞ്ജനയുടെ മലയാള അരങ്ങേറ്റം മോഹൻലാൽ ചിത്രമായ കാസനോവയിലൂടെയായിരുന്നു. ദ കിംഗ് ആൻഡ് കമ്മീഷണർ, ചിലനേരങ്ങളിൽ ചിലർ എന്നീ ചിത്രങ്ങളിലും സഞ്ജന അഭിനയിച്ചിട്ടുണ്ട്.
