ഷാർജ: ഐപിഎല്ലിലെ നാലാം മത്സരത്തിൽ ചെന്നൈ സൂപ്പർ കിംഗ്സിനെതിരെ രാജസ്ഥാൻ റോയൽസിന് മിന്നുന്ന ജയം സമ്മാനിക്കാൻ മുന്നിൽ നിന്നും നയിച്ചത് വിക്കറ്റിന് മുന്നിലും പിന്നിലും സൂപ്പർമാനായി സഞ്ജു സാംസണ്‍ ആണ്.
ഈ വിജയത്തിൽ സഞ്ജുവിനെ അഭിനന്ദിച്ച് കേരള കായിക വകുപ്പ് മന്ത്രി ഇ.പി ജയരാജൻ എത്തി. ഫേസ്ബുക്കിലാണ് മന്ത്രിയുടെ അഭിനന്ദന പോസ്റ്റ്.
സഞ്ജുവിന്‍റെ മികവിൽ രാജസ്ഥാൻ. 16 റണ്‍ ജയം എന്നാണ് പോസ്റ്റിൽ പറയുന്നത്. മന്ത്രിയുടെ പോസ്റ്റിന് അടിയിൽ കായിക പ്രേമികൾ വലിയ ആവേശത്തോടെയാണ് സഞ്ജുവിന് അഭിനന്ദനവുമായി രംഗത്ത് എത്തുന്നത്.
ബാറ്റിംഗിനിറങ്ങിയപ്പോൾ 32 പന്തിൽ 74 റണ്‍സടിച്ച് ടോപ് സ്കോററായ സഞ്ജു വിക്കറ്റിന് പിന്നിലും രണ്ട് മിന്നൽ സ്റ്റംപിംഗുകളും രണ്ട് തകർപ്പൻ ക്യാച്ചുകളുമായി തിളങ്ങി.
സഞ്ജുവിന്‍റെ ഓൾ റൗണ്ട് പ്രകടനത്തിന്‍റെ മികവിൽ ധോണിയുടെ ചെന്നൈ സൂപ്പർ കിംഗ്സിനെ 16 റണ്‍സിന് കീഴടക്കി രാജസ്ഥാൻ റോയൽസ് ഐപിഎല്ലിൽ ആദ്യജയം കുറിച്ചു.
