നെയ്യാറ്റിന്‍കര : കാറില്‍ കടത്താന്‍ ശ്രമിച്ച 160 ലിറ്റര്‍ സ്പിരിറ്റ് എക്സൈസ് സംഘം പിടികൂടി. രണ്ടു പേരെ അറസ്റ്റ് ചെയ്തു.
തിരുപുറം എക്സൈസ് റേഞ്ച് സംഘം അയിര ചെങ്കവിള കുരിശടി ജംഗ്ഷന് സമീപം നടത്തിയ വാഹന പരിശോധനയിലാണ് കാറിന്‍റെ ഡിക്കിയിലൊളിപ്പിച്ച് കടത്താന്‍ ശ്രമിച്ച സ്പിരിറ്റ് കണ്ടെത്തിയത്.
കടകംപള്ളി കണ്ണാന്തുറ ബീച്ചിൽ നെവിൽ ഹൗസിൽ കൂതറ ബാബു എന്ന ബാബു (43), പാറശ്ശാല ഇഞ്ചിവിള നടുത്തോട്ടം വീട്ടിൽ സദാംഹുസ്സൈന്‍ എന്നിവരെ ഇതുമായി ബന്ധപ്പെട്ട് അറസ്റ്റ് ചെയ്തു.
തമിഴ്നാട് നിന്നും സ്പിരിറ്റ് വാങ്ങി വെട്ടുകാടുള്ള ഷൈജുവിന് എത്തിക്കുകയാണ് ഇരുവരും ചെയ്യുകയെന്ന് എക്സൈസ് സംഘം പറഞ്ഞു. കോവിഡ് -19 മാനദണ്ഡം പ്രകാരം പരിശോധനയ്ക്കു ശേഷം പ്രതികളെ ഇന്ന് കോടതിയിൽ ഹാജരാക്കും.
എക്സൈസ് ഇൻസ്‌പെക്ടർ പ്രമോദ് , എസ്.പി.ഒ കെ. ഷാജി, പി.ഒ.ജി ബിജുരാജ്, സി.ഇ.ഒ മാരായ ഷാജു, രഞ്ജിത്, ഷാൻ, രാജേഷ് എന്നിവർ അടങ്ങിയ സംഘമാണ് സ്പിരിറ്റ് പിടികൂടിയത്.
