കൊട്ടാരക്കര: ശാസ്താംകോട്ട കടമ്പനാട് പാകിസ്ഥാൻ മുക്കില്‍ 12 വയസുകാരിയെ പീഡിപ്പിച്ച ശേഷം പുത്തൂർ മാറനാട് മലയില്‍ ഒളിച്ചിരുന്ന പ്രതിയെ പോലീസ് സാഹസികമായി പിടികൂടി.
കടമ്പനാട് തുവയൂര്‍ പാലപ്പള്ളില്‍ വീട്ടില്‍ ഹരിശ്ചന്ദ്രന്‍ 38) നെയാണ് ശാസ്താംകോട്ട പോലീസ് പിടികൂടിയത്. 18ന് പുലർച്ചെ ഒന്നിനായിരുന്നു സംഭവം.
പെണ്‍കുട്ടിയുടെയും കുടുംബത്തിന്‍റേയും വീട്ടുസാധന സാമഗ്രികള്‍ ഇറക്കുന്നതിന് സഹായിയായി എത്തിയ പ്രതി വീട്ടിലെ സാഹചര്യങ്ങള്‍ മനസിലാക്കിയ ശേഷം രാത്രി ജനലിലൂടെ കൈയെത്തി വാതില്‍ തുറന്ന ശേഷം വീട്ടിനകത്ത് കടന്ന് കയറി പെണ്‍കുട്ടിയെ ഉപദ്രവിക്കുകയായിരുന്നു.
രാത്രി ആയതിനാല്‍ പെണ്‍കുട്ടിക്ക് ആളെ തിരിച്ചറിയാന്‍ കഴിഞ്ഞിരുന്നില്ല. മുറ്റത്ത് പതിഞ്ഞിരുന്ന കാല്‍ പാടുകള്‍ വിലയിരുത്തിയാണ് പോലീസ് പ്രതിയിലേക്ക് എത്തിയത്.
പ്രതിയുടെ കാല്‍പാദത്തിന്‍റെ സവിശേഷതകള്‍ പ്രതിയെ കണ്ടെത്തുന്നതിന് പോലീസിന് സഹായകമായി. എസ്ഐ. അനീഷ്, എഎസ്ഐ ഷാജഹാന്‍, കെഎപി സേനാംഗം നന്ദകുമാര്‍, ലഹരിവിരുദ്ധ സ്‌കോഡ് എസ്ഐ.രഞ്ചു, ആഷിര്‍കോഹൂര്‍, സജിജോണ്‍, അനില്‍കുമാര്‍
എന്നിവരുടെ നേതൃത്വത്തില്‍ പ്രതി ഒളിവില്‍ താമസിച്ച്‌കൊണ്ടിരുന്ന മാറനാട് മലയില്‍ നിന്നാണ് ഏറെ നേരത്തെ ശ്രമത്തിനൊടുവില്‍ പോലീസ് പ്രതിയെ പിടികൂടിയത്.
