ബോളിവുഡ് താരം സുശാന്ത് സിംഗ് രാജ്പുത്തിന്റെ മരണം സംഭവിച്ച വിവാദങ്ങള്‍ ഇതുവരെ അവസാനിച്ചിട്ടില്ല.
സുശാന്തിന്റെയും മുന്‍ മാനേജര്‍ ദിഷ സാലിയന്റെയും മരണവുമായി ബന്ധപ്പെട്ട് സോഷ്യല്‍ മീഡിയയിലൂടെ വ്യാജ പ്രചരണം നടത്തിയ ആളാണ് ഇപ്പോള്‍ അറസ്റ്റിലായിരിക്കുന്നത്.
ഡല്‍ഹി സ്വദേശിയായ വിഭോര്‍ ആനന്ദിനെയാണ് മുംബയ് പൊലീസ് അറസ്റ്റ് ചെയ്തത്. ജൂണ്‍ എട്ടിന് കെട്ടിടത്തില്‍ നിന്ന് വീണ് മരിച്ചനിലയിലാണ് ദിഷയുടെ മൃതദേഹം കണ്ടെത്തിയത്.
യുവതി ക്രൂരമായി ബലാത്സംഗം ചെയ്യപ്പെട്ടിട്ടുണ്ടെന്നായിരുന്നു ട്വിറ്ററിലൂടെ വിഭോര്‍ പ്രചാരണം നടത്തിയത്.
ദിഷയുടെ ഫ്‌ളാറ്റില്‍ നടന്ന പാര്‍ട്ടിയില്‍ നടന്‍ സൂരജ് പഞ്ചോളി, അര്‍ബാസ് ഖാന്‍, മന്ത്രി ആദിത്യ താക്കറെ, റിയ ചക്രവര്‍ത്തിയുടെ സഹോദരന്‍ തുടങ്ങിയ സെലിബ്രിറ്റികള്‍ പങ്കെടുത്തിരുന്നുവെന്നും, പാര്‍ട്ടിക്കിടെ അവര്‍ യുവതിയെ ബലാത്സംഗം ചെയ്യുകയും,
പതിനാലാം നിലയിലെ ഫ്‌ളാറ്റില്‍നിന്നു താഴേക്കു തള്ളിയിട്ട് ആത്മഹത്യയാക്കി മാറ്റുകയുമായിരുന്നെന്നായിരുന്നു വിഭോര്‍ സോഷ്യല്‍ മീഡിയയിലൂടെ പ്രചരിപ്പിച്ചത്.
വ്യാജ പ്രചാരണത്തിനെതിരെ അര്‍ബാസ് ഖാന്‍ ഉള്‍പ്പെടെയുള്ളവര്‍ പൊലീസില്‍ പരാതി നല്‍കിയിരുന്നു.
ഇതിന്റെ അടിസ്ഥാനത്തിലാണ് അറസ്റ്റ്. സുശാന്തിന്റെ മരണം കൊലപാതകമാണെന്നും, കഴുത്തില്‍ ചങ്ങല കുരുക്കി സുശാന്തിനെ ശത്രുക്കള്‍ വകവരുത്തിയതാണെന്ന സന്ദേശവും ഇയാള്‍ പ്രചരിപ്പിച്ചിരുന്നു. ഇതേത്തുടര്‍ന്നാണ് ഇയാളെ അറസ്റ്റ് ചെയ്തത്.
