പയ്യന്നൂര്‍: പയ്യന്നൂര്‍ അമാന്‍ ഗോള്‍ഡിനെതിരേ രണ്ടുദിവസങ്ങളിലായി രണ്ടുകേസുകള്‍കൂടി പയ്യന്നൂര്‍ പോലീസ് രജിസ്റ്റര്‍ ചെയ്തു. ഇതോടെ അമാന്‍ ഗോള്‍ഡ് നിക്ഷേപ തട്ടിപ്പിനെതിരെ പയ്യന്നൂര്‍ പോലീസ് രജിസ്റ്റര്‍ ചെയ്ത കേസുകളുടെ എണ്ണം 17 ആയി.
കുഞ്ഞിമംഗലം തലായിലെ കൊവ്വപ്പുറത്ത് സാലിഹയുടെ പരാതിയിലാണ് പുതിയ കേസ്. അമാന്‍ ഗോള്‍ഡില്‍ 2013 ഫെബ്രുവരി 15-ന് 50.710 ഗ്രാം സ്വര്‍ണവും 2017 സെപ്റ്റംബർ 19ന് 1,80,000 രൂപയും നിക്ഷേപിച്ചുവെന്നും ഇത് തിരിച്ചുതരാതെ വഞ്ചിച്ചെന്നുമാണ് പരാതി.
അമാന്‍ ഗോള്‍ഡ് മാനേജിംഗ് പാര്‍ട്ട്ണര്‍ രാമന്തളി വടക്കുമ്പാട്ടെ പി.കെ.മൊയ്തുഹാജി, പാര്‍ട്ട്ണര്‍മാരായ നിസാര്‍, സി.എച്ച്.അഷ്‌റഫ്, കെ.പി.എം.കുഞ്ഞി, ബഷീര്‍, ഷംസു ഹാജി, സിയാലി എന്നീ ഏഴുപേര്‍ക്കെതിരെയാണ് പോലീസ് കേസെടുത്തത്.
തൃക്കരിപ്പൂര്‍ ഉടുമ്പുന്തലയിലെ കെ.പി.കുഞ്ഞാമിനയുടെ പരാതിയില്‍ കഴിഞ്ഞ ദിവസം കേസെടുത്തിരുന്നു. 2016 ഒക്‌ടോബര്‍ 19-ന് നിക്ഷേപിച്ച നാലുലക്ഷം രൂപ തിരിച്ചുതരാതെ വഞ്ചിച്ചുവെന്ന ഇവരുടെ പരാതിയില്‍ മൊയ്തു ഹാജിക്കെതിരെ കേസെടുത്തിരുന്നു.
അതിനുമുമ്പ് അമാന്‍ ഗോള്‍ഡ് നിക്ഷേപത്തട്ടിപ്പിനെതിരേ 15 കേസുകള്‍ പോലീസ് രജിസ്റ്റര്‍ ചെയ്തിരുന്നു.
