മാറഞ്ചേരി: മാറഞ്ചേരി ഗവ.ഹയര്‍ സെക്കന്‍ഡറി സ്‌കൂളിലെയും വന്നേരി ഹയര്‍ സെക്കന്‍ഡറി സ്‌കൂളിലെ വിദ്യാര്‍ഥികളും അധ്യാപകരും ജീവനക്കാരും അടക്കം 262 പേര്‍ക്ക് കോവിഡ് സ്ഥിരീകരിച്ച സാഹചര്യത്തില്‍ പ്രദേശം ആശങ്കയില്‍.
സ്‌കൂളുകള്‍ അടച്ചു. കോവിഡ് പോസിറ്റീവായവരോട് സമ്പര്‍ക്കമുള്ളവര്‍ ക്വാറന്റൈനില് പ്രവേശിക്കാന്‍ ആരോഗ്യവകുപ്പ് നിര്‍ദേശം നല്‍കി. ഇരുസ്‌കൂളുകളിലെയും മറ്റു വിദ്യാര്‍ഥികളെയും അധ്യാപകരെയും ജീവനക്കാരെയും പരിശോധനയ്ക്ക് വിധേയമാക്കും.
മാറഞ്ചേരി ഗവ.ഹയര്‍ സെക്കന്‍ഡറി സ്‌കൂളിലെ 148 വിദ്യാര്‍ഥികള്‍ക്കും 39 അധ്യാപകര്‍ക്കും ജീവനക്കാര്‍ക്കുമാണ് കോവിഡ് പോസിറ്റീവായത്. വന്നേരി ഹയര്‍ സെക്കന്‍ഡറി സ്‌കൂളിലെ 36 അധ്യാപകരും 39 വിദ്യാര്‍ഥികള്‍ക്കുമാണ് കോവിഡ് ബാധിച്ചത്.
മാറഞ്ചേരി ഗവ.ഹയര്‍ സെക്കന്‍ഡറി സ്‌കൂളില്‍ കഴിഞ്ഞ ദിവസം ഒരു വിദ്യാര്‍ഥിക്ക് പോസിറ്റീവ് ആയതിനെ തുടര്‍ന്ന് സ്‌കൂളില്‍ നടത്തിയ ആര്‍ടിപിസിആര്‍ പരിശോധനയിലാണ് പോസിറ്റീവ് സ്ഥിരീകരിച്ചത്. വെള്ളിയാഴ്ച നടത്തിയ ടെസ്റ്റിന്‍റെ ഫലം ഞായറാഴ്ചയാണ് പുറത്ത് വന്നത്.
വന്നേരി ഹയര്‍ സെക്കന്‍ഡറി സ്‌കൂളിലെ ഒരു അധ്യാപികക്ക് കോവിഡ് 19 സ്ഥിരീകരിച്ചതിനെ തുടര്‍ന്ന് നടത്തിയ ടെസ്റ്റില്‍ സ്‌കൂളിലെ 36 അധ്യാപകര്‍ക്കും 39 വിദ്യാര്‍ഥികള്‍ക്കും കോവിഡ് 19 സ്ഥിരീകരിക്കുകയായിരുന്നു.
മാറഞ്ചേരി ഗവണ്‍മെന്‍റ് ഹയര്‍ സെക്കന്‍ഡറി സ്‌കൂളില്‍ 590 വിദ്യാര്‍ഥികള്‍ എസ്എസ്എല്‍സിക്ക് പഠിക്കുന്നുണ്ട്. 348 വിദ്യാര്‍ഥികള്‍ ഹയര്‍ സെക്കൻഡറി വിഭാഗത്തില്‍ പഠിക്കുന്നുണ്ട്. ഈ വിഭാഗത്തില്‍ പരിശോധന നടത്തിയിട്ടില്ല. വന്നേരി ഹയര്‍ സെക്കന്‍ഡറി സ്‌കൂളിലെ മുഴുവന്‍ അധ്യാപകരും പോസിറ്റീവ് സ്ഥിരീകരിച്ചവരില്‍ പെടുന്നു.
മുഴുവന്‍ സ്‌കൂളുകളും ജാഗ്രത പുലര്‍ത്തണമെന്ന്ആരോഗ്യവകുപ്പ്
മലപ്പുറം: മാറഞ്ചേരി ഹയര്‍സെക്കന്‍ഡറി സ്‌കൂളില്‍ കുട്ടികള്‍ക്കും അധ്യാപകര്‍ക്കും കോവിഡ് ബാധ സ്ഥിരീകരിച്ചതിനാല്‍ ജില്ലയിലെ മുഴുവന്‍ സ്‌കൂളുകളിലും അതീവ ജാഗ്രത പുലര്‍ത്തണമെന്ന് ജില്ലാ മെഡിക്കല്‍ ഓഫീസര്‍ ഡോ.കെ.സക്കീന അറിയിച്ചു.
മാറഞ്ചേരി ഗവ. ഹയര്‍സെക്കന്‍ഡറി സ്‌കൂളിലെ പത്താം ക്ലാസില്‍ പഠിക്കുന്ന 14 വയസുള്ള ആണ്‍കുട്ടിയെ ഫെബ്രുവരി ഒന്നിന് മാറഞ്ചേരി സാമൂഹ്യ ആരോഗ്യ കേന്ദ്രത്തില്‍ നിന്നും സ്രവ പരിശോധനക്കായി റഫര്‍ ചെയ്യുകയും ആന്റിജന്‍ പരിശോധനയില്‍ പോസിറ്റീവ് ആവുകയും ചെയ്തിരുന്നു.
തൊട്ടടുത്ത ദിവസം സ്‌കൂളിലെ മൂന്ന് അധ്യാപകര്‍ രോഗലക്ഷണം പ്രകടിപ്പിച്ചതിനെ തുടര്‍ന്ന് ആന്റിജന്‍ പരിശോധന നടത്തുകയും നെഗറ്റീവ് ആണെന്ന് റിസള്‍ട്ട് വരികയും ചെയ്തു. വിദ്യാര്‍ഥി പോസിറ്റീവ് ആവുകയും അധ്യാപകര്‍ രോഗലക്ഷണം പ്രകടിപ്പിക്കുകയും ചെയ്തതിനാല്‍ പ്രദേശത്ത് രോഗ ബാധ പടര്‍ന്നിട്ടുണ്ടോ എന്നറിയുന്നതിനുള്ള പരിശോധന നടത്തിയിരുന്നു.
വന്നേരി സ്‌കൂളിലെ ഒരു അധ്യാപകനും രോഗ ബാധ സ്ഥിരീകരിച്ചതിനാല്‍ സ്‌കൂളിലും പരിശോധന നടത്തി. പ്രദേശത്ത് കര്‍ശന നിരീക്ഷണം തുടരുന്നതായും എല്ലാ മുന്‍കരുതല്‍ നടപടികളും സ്വീകരിച്ചതായും ഡിഎംഒ അറിയിച്ചു.
ഇപ്പോള്‍ പോസിറ്റീവ് ആയവരുമായി അടുത്ത സമ്പര്‍ക്കത്തില്‍ വന്നവരെയും വരും ദിവസങ്ങളില്‍ ആര്‍ടിപിസിആര്‍ പരിശോധനയ്ക്ക് വിധേയരാക്കാന്‍ ആവശ്യമായ നടപടികളും സ്വീകരിച്ചിട്ടുണ്ട്.
സ്‌കൂളുകള്‍ക്കുള്ള മാര്‍ഗനിര്‍ദേശങ്ങള്‍:
* കുട്ടികള്‍ തമ്മില്‍ രണ്ട് മീറ്റര്‍ ശാരീരിക അകലം പാലിക്കണം. ഇതിനായി ആവശ്യമെങ്കില്‍ മറ്റു ക്ലാസ്‌റൂമുകള്‍ കൂടി ഉപയോഗപ്പെടുത്തണം.
* കോവിഡ് രോഗബാധിതര്‍ (കുട്ടികള്‍, അധ്യാപകര്‍, സ്‌കൂള്‍ ജീവനക്കാര്‍), രോഗ ലക്ഷണങ്ങള്‍ ഉള്ളവര്‍, ക്വാറന്റൈനില് ഉള്ളവര്‍, കോവിഡ് പോസിറ്റീവ് ആയിട്ടുള്ള രോഗികളുടെ വീടുകളില്‍ നിന്ന് വിദ്യാര്‍ഥികള്‍, രക്ഷാകര്‍ത്താക്കള്‍, മറ്റ് ജീവനക്കാര്‍ എന്നിവര്‍ ആരോഗ്യവകുപ്പ് നിശ്ചയിച്ചിട്ടുള്ള ദിവസങ്ങള്‍ക്കു ശേഷം മാത്രമേ സ്‌കൂളുകളില്‍ ഹാജരാകുവാന്‍ പാടുള്ളൂ.
*സ്‌കൂള്‍ പരിസരം, ഫര്‍ണിച്ചറുകള്‍, സ്‌റ്റേഷനറി, സ്‌റ്റോര്‍ റൂം, വാട്ടര്‍ടാങ്ക്, അടുക്കള, സ്‌കൂള്‍ ക്വാറന്റൈന്‍, ശുചിമുറി, ലാബ്, ലൈബ്രറി തുടങ്ങിയ എല്ലാ സ്ഥലങ്ങളും അണുവിമുക്തമാക്കണം.
* കോവിഡ് 19 നൊപ്പം ജലജന്യരോഗങ്ങളും കണ്ടുതുടങ്ങിയിട്ടുള്ളതിനാല്‍ കുടിവെള്ള ടാങ്ക്, കിണറുകള്‍, മറ്റ് ജലസ്രോതസുകള് എന്നിവ നിര്‍ബന്ധമായും ബ്ലീച്ചിങ്ങ് ലായനി ഉപയോഗിച്ച് അണുവിമുക്തമാക്കണം. പ്രാഥമ ആരോഗ്യകേന്ദ്രങ്ങളുമായി ബന്ധപ്പെട്ട് ഇതിനുള്ള ക്രമീകരണങ്ങള്‍ നടത്തണം.
*പഴയ ഭക്ഷണ സാധനങ്ങള്‍ എല്ലാം തന്നെ ഒഴിവാക്കി പുതിയവ ഉപയോഗിച്ച് മാത്രം ഭക്ഷണം ഉണ്ടാക്കണം.
* സ്‌കൂളുകളില്‍ മാസ്‌ക്, ഡിജിറ്റല്‍തെര്‍മോമീറ്റര്‍, സാനിറ്റൈസര്‍, സോപ്പ് തുടങ്ങിയവ സജ്ജീകരിക്കണം.
* കോവിഡ് പ്രോട്ടോക്കോള് പാലിച്ചായിരിക്കണം കുട്ടികള്‍ ക്ലാസുകളില്‍ ഇരിക്കേണ്ടത്. സ്റ്റാഫ് റൂമിലും അധ്യാപകര്‍ക്ക് നിശ്ചിത അകലം പാലിച്ച് കൊണ്ടുള്ള ഇരിപ്പിടങ്ങള്‍ ക്രമീകരിക്കണം.
* സാമൂഹിക/ശാരീരിക അകലം പാലിക്കുന്നത് കുട്ടികളെ ഓര്‍മിപ്പിച്ചുകൊണ്ട് പോസ്റ്ററുകള്‍, സ്റ്റിക്കറുകള്‍, സൂചനാ ബോര്‍ഡുകള്‍ എന്നിവ ക്ലാസ് റൂമുകള്‍, ലൈബ്രറികള്‍, കൈകള്‍ വൃത്തിയാക്കുന്ന ഇടങ്ങള്‍, വാഷ്‌റൂമിന് പുറത്ത്, സ്‌കൂള്‍ ബസ് തുടങ്ങിയ ഇടങ്ങളില്‍ പതിക്കാന്‍ പ്രത്യേകം ശ്രദ്ധിക്കണം.
* കുടിവെള്ളം ലഭ്യമാകുന്ന സ്ഥലം, കൈകള്‍ കഴുകുന്ന സ്ഥലം, വാഷ്‌റൂം തുടങ്ങിയ സ്ഥലങ്ങളിലും കോവിഡ് പ്രോട്ടോകോള് പാലിക്കുന്നതിനായി നിശ്ചിത അകലത്തില്‍ അടയാളപ്പെടുത്തലുകള്‍ വരുത്തണം.
* കുട്ടികള്‍ക്കും അധ്യാപകര്‍ക്കും ആവശ്യമായ ഘട്ടങ്ങളില്‍ ആരോഗ്യ പരിശോധനാ സൗകര്യം ഒരുക്കണം.
* സ്‌കൂള്‍ വാഹനത്തിനുള്ളിലും മറ്റ് വാഹനങ്ങളിലും എല്ലാവരും സാമൂഹിക അകലം പാലിക്കുക. സ്‌കൂള്‍ വാഹനങ്ങളില്‍ പ്രവേശിക്കുന്നതിനു മുമ്പ് തെര്‍മല്‍ സ്‌ക്രീനിംഗ് നടത്തണം. വാഹനങ്ങള്‍ക്കുള്ളില്‍ മാസ്‌ക് നിര്‍ബന്ധമാക്കണം. വാഹനത്തിന്റെ ജനാലകളില്‍ കര്‍ട്ടനുകള്‍ ഇടാതിരിക്കുക. എല്ലാ ജനാലകളും തുറന്നിടാന്‍ ശ്രദ്ധിക്കണം.
* കോവിഡ് രോഗബാധിതര്‍, ക്വാറന്റൈനില് കഴിയുന്ന അധ്യാപകര്‍ എന്നിവര്‍ പ്രസ്തുത വിവരം പ്രഥമാധ്യാപകരെ രേഖാമൂലം അറിയിക്കണം. അതനുസരിച്ചുള്ള ക്രമീകരണങ്ങള്‍ പ്രഥമധ്യാപകര്‍ സ്‌കൂളുകളില്‍ വരുത്തണം.
* കുട്ടികളുടെ തിരക്ക് ഒഴിവാക്കുന്നതിനായി സ്‌കൂളുകളില്‍ ഷിഫ്റ്റ് സമ്പ്രദായം ഏര്‍പ്പെടുത്തണം. ഓരോ സ്‌കൂളിലെയും സാഹചര്യം കണക്കിലെടുത്ത് സ്‌കൂള്‍ തലത്തില്‍ തീരുമാനമെടുക്കുന്നതിന് നേതൃത്വം നല്‍കുക. ഓരോ ഷിഫ്റ്റിലും എത്തിച്ചേരുന്ന കുട്ടികള്‍, എത്തിച്ചേരേണ്ട അധ്യാപകര്‍, റിവിഷന്‍ നടത്താനുദ്ദേശിക്കുന്ന വിഷയങ്ങള്‍ എന്നിവ സംബന്ധിച്ച വ്യക്തത സ്‌കൂള്‍തലത്തില്‍ ഉണ്ടാകണം.
* രക്ഷകര്‍ത്താക്കളുടെ സമ്മതപത്രത്തിന്റെ അടിസ്ഥാനത്തില്‍ മാത്രമേ കുട്ടികളെ സ്‌കൂളില്‍ പ്രവേശിപ്പിക്കാന്‍ പാടുള്ളൂ. ഇക്കാര്യം മുന്‍കൂട്ടി രക്ഷകര്‍ത്താക്കളെ അറിയിക്കണം.
* എല്ലാ സ്‌കൂളുകളിലും പ്രിന്‍സിപ്പല്‍/ഹെഡ്മാസ്റ്റര്‍ സ്‌കൂള്‍ കോവിഡ് സെല്‍ രൂപീകരിക്കേണ്ടതും കോവിഡ് സെല്ലില്‍ പ്രാഥമിക ആരോഗ്യകേന്ദ്രത്തില്‍നിന്നും ജൂനിയര്‍ ഹെല്‍ത്ത് ഇന്‍സ്‌പെക്ടര്‍, ജൂണിയര്‍ പബ്ലിക് ഹെല്‍ത്ത് നേഴ്‌സ് (ജെപിഎച്ച്എന്‍) എന്നിവര്‍ ഉണ്ടായിരിക്കണം.
