റോത്തക്ക്: രാജ്യത്തെ ഞെട്ടിച്ചു ഹരിയാനയിലെ റോത്തക്കിൽ ഗുസ്തി പരിശീലനകേന്ദ്രത്തിൽ കൂട്ടക്കൊല. കേന്ദ്രത്തിലു ണ്ടായ വെടിവയ്പിൽ അഞ്ചുപേർ കൊല്ലപ്പെട്ടു. കേന്ദ്രത്തിന്‍റെ ഉടമ ഉൾപ്പെടെയുള്ളവരാണ് മരിച്ചത്. മരിച്ചവരിൽ രണ്ടു വനിതാ താരങ്ങളും കോച്ചും ഉൾപ്പെടുന്നതായിട്ടാണ് സൂചന.
ഒരു കുട്ടിയടക്കം മൂന്നു പേർക്കു പരിക്കേറ്റിട്ടുണ്ട്. ഇന്നലെ വൈകിട്ടാണ് സംഭവം.റോത്തക്കിൽ സ്വകാര്യ സ്കൂളിനു സമീപത്തുള്ള പരിശീലന കേന്ദ്രത്തിലാണ് വെടിവയ്പ്പുണ്ടായത്. മുൻവൈരാഗ്യമാണ് ആക്രമണത്തിനു പിന്നിലെന്നാണു പോലീസ് കരുതുന്നത്.
പരിശീലന കേന്ദ്രത്തിന്‍റെ ഉടമയായ മനോജ്, ഭാര്യ സാക്ഷി, പ്രദീപ്, സതീഷ്, പൂജ എന്നിവരാണ് മരിച്ചത്. മനോജിന്റെ രണ്ടരവയസുള്ള മകനും പരിക്കേറ്റു.സമീപവാസികൾ വിവരമറിയിച്ചതിനെ തുടർന്ന് പോലീസ് എത്തിയാണ് പരിക്കേറ്റവരെ ആശുപത്രിയിൽ എത്തിച്ചത്.
മൃതദേഹങ്ങൾ പോസ്റ്റ്മോർട്ടത്തിനയച്ചു. ഇതേ ഗ്രാമത്തിലെ മറ്റൊരു ഗുസ്തി പരിശീലകനായ സുഖ്‌വിന്ദറിനെ കേന്ദ്രീകരിച്ചാണ് അന്വേഷണം നടക്കുന്നത്. വെടിവച്ചത് ഇയാളും സംഘവുമാണെന്നാണ് പ്രാഥമിക നിഗമനം.
