വൈപ്പിന്‍: നട്ടപ്പാതിരാക്കു കോതമംഗലത്തുനിന്നു വൈപ്പിനിലെത്തി പതിനേഴുകാരിയായ പ്ലസ്ടു വിദ്യാര്‍ഥിനിയെ വീടിനുള്ളില്‍ വച്ചു പീഡിപ്പിച്ച യുവാവും കൂട്ടാളിയും അറസ്റ്റില്‍. വിദ്യാര്‍ഥിനിയുടെ പിതാവിന്റെ പരാതിയെ തുടര്‍ന്നു ഞാറക്കല്‍ പോലീസാണു രണ്ടുപേരെയും അറസ്റ്റ്‌ചെയ്തത്. കോതമംഗലം കോട്ടപ്പടി സ്വദേശികളായ മേബിന്‍ (22), ഷൈജു (34) എന്നിവരാണു പ്രതികള്‍.
മേബിന്‍ ആണു പെണ്‍കുട്ടിയെ പീഡിപ്പിച്ചതെന്നു പോലീസ് പറഞ്ഞു. ഇയാള്‍ക്കു സാഹയം ചെയ്തു എന്ന കുറ്റത്തിനാണു ഷൈജുവിനെതിരേ കേസുള്ളതെന്നു ഞാറക്കല്‍ സിഐ സി.ആര്‍. രാജു അറിയിച്ചു. തിങ്കളാഴ്ച പുലര്‍ച്ചെ രണ്ടോടെ ഞാറക്കല്‍ എസ്‌ഐ ആര്‍. രഗീഷ് കുമാറും സംഘവും രാത്രികാല പട്രോളിംഗ് നടത്തുന്നതിനിടെ എളങ്കുന്നപ്പുഴ സംസ്ഥാനപാതയില്‍നിന്നു ഷൈജുവിനെയാണ് ആദ്യം കസ്റ്റഡിയിലെടുത്തത്. സംശയാസ്പദമായ രീതിയില്‍ കണ്ടു ചോദ്യം ചെയ്തപ്പോള്‍ സുഹൃത്തായ മേബിനുമൊന്നിച്ചു മേബിന്റെ കാമുകിയുടെ വീട്ടില്‍ വന്നതാണെന്നു പറഞ്ഞു.
പോലീസ് അന്വേഷണം ആരംഭിച്ചതോടെ പെണ്‍കുട്ടിയുടെ പിതാവ് പരാതിയുമായി പോലീസ് സ്റ്റേഷനില്‍ എത്തുകയും വൈദ്യപരിശോധന നടത്തി കേസെടുക്കുകയുമായിരുന്നു. പെണ്‍കുട്ടിയും യുവാവും രണ്ടുവര്‍ഷമായി പ്രണയത്തിലാണത്രേ. നേരത്തെ യുവാവ് എറണാകുളത്ത് ജോലി ചെയ്യവേയാണു പെണ്‍കുട്ടിയെ പരിചയപ്പെട്ടതെന്നു പറയുന്നു. പെണ്‍കുട്ടിയുടെ സഹോദരിയുടെ സഹപ്രവര്‍ത്തകനായിരുന്നു പ്രതിയെന്നും പോലീസ് പറഞ്ഞു. പ്രതികളെ ഇന്നു കോടതിയില്‍ ഹാജരാക്കും.
