കൊച്ചി: പ്രതിരോധ താരം സഞ്ജീവ് സ്റ്റാലിൻ കേരള ബ്ലാസ്റ്റേഴ്സിൽ. മൂന്ന് വർഷത്തെ കരാറാണ് സഞ്ജീവുമായി ബ്ലാസ്റ്റേഴ്സ് ഒപ്പുവച്ചിരിക്കുന്നത്.പോർച്ചുഗീസ് ടീമായ എയ്‌വീസിൽ നിന്നാണ് ഇരുപതുകാരനായ ലെഫ്റ്റ് ബാക്ക് താരം കേരള ബ്ലാസ്റ്റേഴ്സ് എഫ്സിയിൽ ചേരുന്നത്.
ചണ്ഡിഗഡ് ഫുട്ബോൾ അക്കാദമിയിൽ നിന്നാണ് സ്റ്റാലിൻ ഫുട്ബോൾ കരിയർ തുടങ്ങുന്നത്, 2017ൽ ഇന്ത്യൻ ആരോസിലൂടെ സീനിയർ തലത്തിലെത്തി. സെറ്റ്പീസ് മികവുള്ള രാജ്യത്തെ ഏറ്റവും മികച്ച യുവതാരങ്ങളിൽ ഒരാളായി പ്രശസ്തി നേടിയ സ്റ്റാലിൻ മൂന്ന് സീസണുകളിലായി 28 മത്സരങ്ങളിൽ ഇന്ത്യൻ ആരോസിന് വേണ്ടി ബൂട്ടണിഞ്ഞു.
ഇന്ത്യയുടെ അണ്ടർ-17, അണ്ടർ-20 ടീമുകൾക്കായും കളിച്ചു. തന്‍റെ കരിയറിലെ ഒരു സ്വപ്നം എന്നാണ് കേരള ബ്ലാസ്റ്റേഴ്സ് എഫ്സിയുമായുള്ള കരാർ ഒപ്പിടലിനെ സ്റ്റാലിൻ വിശേഷിപ്പിച്ചത്. സീസണ്‍ തുടങ്ങാനും ആരാധകർക്ക് മുന്നിൽ കളിക്കാനും കാത്തിരിക്കാനാവുന്നില്ലെന്നും അദ്ദേഹം പറഞ്ഞു.
കേരള ബ്ലാസ്റ്റേഴ്സ് എഫ്സിയുമായി തന്‍റെ ഫുട്ബോൾ യാത്ര തുടരുന്നതിലും, യൂറോപ്പിലെ പരിശീലനത്തിനുശേഷം ഇന്ത്യൻ സൂപ്പർ ലീഗിലേക്ക് മടങ്ങിവരുന്നതിലും സന്തോഷമുണ്ടെന്ന് സഞ്ജീവ് സ്റ്റാലിൻ പ്രതികരിച്ചു.
