കോഴിക്കോട്: സോളാര്‍ തട്ടിപ്പുമായി ബന്ധപ്പെട്ട് കോഴിക്കോട് രജിസ്റ്റര്‍ ചെയ്ത ബിജു രാധാകൃഷ്ണനെതിരായ കേസ് മൂന്നാം ജുഡീഷല്‍ ഒന്നാം ക്ലാസ് മജിസേ്ട്രറ്റ് കോടതി ഈമാസം 27-ലേക്ക് മാറ്റി.
പ്രതിക്ക് കോവിഡ് സ്ഥിരീകരിച്ചതിനെ തുടര്‍ന്നാണിത്.
കേസില്‍ രണ്ടാം പ്രതി സരിത എസ്.നായര്‍ക്ക് ആറുകൊല്ലം കഠിനതടവും 40,000 രൂപ പിഴയും ദിവസങ്ങള്‍ക്ക് മുന്‍പ് വിധിച്ച കോടതി ഒന്നാം പ്രതി ബിജു രാധാകൃഷ്ണനും കുറ്റക്കാരനെന്ന് കണ്ടെത്തിയിരുന്നു.
എന്നാല്‍ അന്ന് കോവിഡ് പ്രാഥമിക സമ്പര്‍ക്കമുണ്ടെന്ന രേഖകള്‍ ഹാജരാക്കിയതിനെ തുടര്‍ന്ന് ബിജുവിനെതിരായ വിധി മാറ്റിവയ്ക്കുകയായിരുന്നു.
27ന് ബിജു ഹാജരാവണമെന്ന് കോടതി നിര്‍ദ്ദേശിച്ചു. മൂന്നു പ്രതികളുള്ള കേസില്‍ മൂന്നാം പ്രതി ബി.മണിമോനെ വെറുതെ വിട്ടിരുന്നു. ഓണ്‍ലൈനായാണ് കേസ് പരിഗണിച്ചത്.
