മൂവാറ്റുപുഴ: ആർഡിഒ ആയിരുന്ന പി.എസ്. സന്തോഷ് ദുരൂഹ സാഹചര്യത്തിൽ മരിച്ചിട്ട് കാൽനൂറ്റാണ്ട് പിന്നിടുന്പോൾ അനാഥമായി ആർഡിഒ ക്വാർട്ടേഴ്സ്.
ആർഡിഒ സന്തോഷിന്റെ ദുരൂഹമരണത്തിനു ശേഷം ക്വാർട്ടേഴ്സിൽ താമസിക്കാൻ ഇതുവരെ ആരും തയാറായിട്ടില്ല. കാടുപിടിച്ച് കിടക്കുന്ന ഇവിടേക്ക് ആരും തിരിഞ്ഞുനോക്കാറുമില്ല.
മൂവാറ്റുപുഴ ആർഡിഒ ആയിരുന്ന സന്തോഷിന്റെ അഴുകിയ മൃതദേഹം ആർഡിഒ ക്വാർട്ടേഴ്സിൽ കണ്ടെത്തിയത് 1995 മേയ് 20നായിരുന്നു. മൃതദേഹത്തിന് മൂന്നു ദിവസത്തെ പഴക്കമുണ്ടായിരുന്നു.
മിടുക്കനായ ആർഡിഒയുടെ മരണം കൊലപാതകമാണെന്നും ആത്മഹത്യയാണെന്നും ഹൃദയസ്തംഭനം മൂലമുള്ള സ്വാഭാവിക മരണമാണെന്നുമൊക്കെ വിശദീകരണങ്ങളും അനുബന്ധ കഥകളും നാട്ടിൽ പ്രചരിച്ചു.
നിരവധി അന്വേഷണ സംഘങ്ങൾ അന്വേഷിച്ചു. സന്തോഷിന്റെ അമ്മ നടത്തിയ പ്രക്ഷോഭങ്ങൾക്കൊടുവിൽ സിബിഐയും കേസ് അന്വേഷിച്ചു.
കൊലപാതകമാണെന്നും ആത്മഹത്യയാണെന്നും അന്വേഷണ സംഘങ്ങൾ പലവിധ നിഗമനങ്ങളിലുമെത്തി. എന്നാൽ എല്ലാവർക്കും വിശ്വസനീയമായ വിധത്തിലുള്ള റിപ്പോർട്ട് ആരിൽ നിന്നുമുണ്ടായില്ല.
ഒരു റിപ്പോർട്ടിനും സന്തോഷിന്റെ അമ്മയ്ക്കും പൊതുജനത്തിനുമുള്ള സംശയങ്ങൾക്ക് പൂർണമായി മറുപടി നൽകാൻ കഴിഞ്ഞില്ല.
സന്തോഷ് മരിച്ചുവെന്നു പറയുന്ന 1995 മേയ്17ന് ആത്മഹത്യ ചെയ്യാൻ തക്കവിധത്തിലുള്ള മാനസിക സംഘർഷങ്ങൾ സന്തോഷിനുണ്ടായിരുന്നില്ലെന്ന് ആ ദിവസം രാത്രി വൈകിയും അദ്ദേഹത്തിനൊപ്പമുണ്ടായിരുന്ന ബാങ്ക് ഉദ്യോഗസ്ഥന്റെ കുടുംബം വ്യക്തമാക്കിയിരുന്നു.
സിബിഐ നിയോഗിച്ച മാനസികാരോഗ്യ വിദഗ്ധരുടെ സംഘവും ആത്മഹത്യയിലേക്കു നയിക്കുന്ന മാനസിക സമ്മർദത്തിലല്ല സന്തോഷ് എന്ന പഠന റിപ്പോർട്ട് നൽകിയിരുന്നു.
ഇനി ആത്മഹത്യ ചെയ്തുവെങ്കിൽ പോലും ഇത് എന്തിനായിരുന്നുവെന്നതിന് വിശ്വസനീയമായ ഒരു കാരണം കണ്ടെത്താൻ അന്വേഷണ സംഘത്തിനായില്ല.
സന്തോഷിന്റെ മൃതദേഹം അസാധാരണമായി ധൃതിപിടിച്ച് ദഹിപ്പിച്ചതും അന്വേഷണ സംഘങ്ങൾ തന്നെ വ്യത്യസ്തമായ കണ്ടെത്തലുകൾ നടത്തിയതും തെളിവുകൾ നശിപ്പിക്കാനുള്ള ശ്രമവുമൊക്കെ നിറമുള്ള കഥകൾക്ക് ഊടും പാവും നൽകി.
17ന് മരിച്ച ആർഡിഒയെ 20നാണ് മരിച്ച നിലയിൽ കണ്ടെത്തിയുള്ളുവെന്നതും അതുവരെ അദ്ദേഹത്തെ ആരും അന്വേഷിച്ചില്ലായെന്നതുമൊക്കെ സംശയങ്ങൾക്ക് ബലമേകി.
ഓരോ ദിവസവും സമൂഹത്തിൽ മാന്യന്മാരായിരുന്നവരെ പോലും സംശയിക്കുന്ന വിധത്തിൽ കഥകൾ പ്രചരിച്ചു. ഇവരൊക്കെ ഇപ്പോഴും സംശയത്തിന്‍റെ പുകമറയിൽ തന്നെ നിൽക്കുന്നു.
നാല് അന്വേഷണ സംഘങ്ങൾ മാറിമാറി അന്വേഷിച്ചപ്പോഴൊക്കെ നിരവധി പേർ സമൂഹത്തിനു മുന്നിൽ കുറ്റവാളികളായി ചിത്രീകരിക്കപ്പെട്ടു. ഇതിനെല്ലാം മൂകസാക്ഷിയായ ആർഡിഒ ക്വാർട്ടേഴ്സ് നാട്ടുകാർക്കിടയിൽ പ്രേതഭവനമായി.
സന്തോഷിന്റെ മരണശേഷം ഇവിടെ താമസിക്കാൻ ഒരു വനിതാ ഉദ്യോഗസ്ഥ തയാറായെത്തിയെങ്കിലും ഒരു ദിവസം മാത്രമായിരുന്നു ഇവർ ഇവിടെ താമസിച്ചത്. പിന്നീട് പലരും സന്നദ്ധത അറിയിച്ചെങ്കിലും അവസാന നിമിഷം ഒഴിഞ്ഞു മാറുകയായിരുന്നു.
നഗരമധ്യത്തിൽ എൻജിഒ ക്വാട്ടേഴ്സ് വളപ്പിൽ ഇപ്പോഴും ആർഡിഒ ക്വാർട്ടേഴ്സ് ആർഡിഒ സന്തോഷിന്റെ മരണത്തിലെ ദുരൂഹതയുടെ പേടിപ്പെടുത്തുന്ന സ്മാരകമായി നിലനിൽക്കുന്നു. പ്രേതാലയമെന്ന വിശേഷണവും ഇപ്പോഴിതിനുണ്ട്.
ഇവിടെ സാംസ്കാരിക നിലയം നിർമിക്കാനും മിനി സ്റ്റേഡിയം നിർമിക്കാനുമൊക്കെ പദ്ധതി തയാറാക്കി പ്രവർത്തനങ്ങൾ ആരംഭിച്ചുവെങ്കിലും ഒന്നും തുടങ്ങാൻ സാധിച്ചില്ല.
മുറിക്കല്ല് ബൈപാസിന് സ്ഥലം ഏറ്റെടുക്കുന്പോൾ ക്വാർട്ടേഴ്സിനു ശാപമോഷം നൽകുമെന്ന പ്രതീക്ഷയിലാണ് പ്രദേശവാസികൾ.
