അടുത്തിടെ റിലീസ് ചെയ്ത ചിത്രങ്ങളില്‍ മികച്ച പ്രേക്ഷക പ്രശംസ നേടി കുതിക്കുകയാണ് കിസ്മത്ത്. ഷാനവാസ് കെ. ബാവക്കുട്ടി സംവിധാനം ചെയ്ത ചിത്രം പ്രമേയത്തിലും അവതരണത്തിലും മികച്ചുനില്‍ക്കുവെന്ന പ്രശംസയ്ക്കിടെ വിവാദമായേക്കാവുന്നൊരു ആരോപണവുമായി സംവിധായകന്‍ രംഗത്തെത്തിയിരിക്കുന്നു. ചിത്രം മോശമാണെന്ന തോന്നല്‍ ഉണ്ടാക്കാന്‍ ചിലര്‍ ബോധപൂര്‍വ്വം ശ്രമിച്ചെന്നാണ് സിനിമയുടെ അണിയറപ്രവര്‍ത്തകരുടെ പരാതി. ഒരു പ്രമുഖ യുവനടന്റെ ഫാന്‍സുകാരാണ് കൂവിത്തോല്‍പ്പിക്കാന്‍ ശ്രമിച്ചതെന്നാണ് ആരോപണം.
കിസ്മത്തിന്റെ റിലീസിംഗിന്റെ ആദ്യ ദിനത്തിലെ ആദ്യ ഷോയില്‍ തന്നെ കൂവല്‍ ഉണ്ടായെന്നാണ് അണിയറക്കാര്‍ പറയുന്നത്. കോഴിക്കോട്, എറണാകുളം ജില്ലകളിലെ പ്രധാന തീയേറ്ററുകളിലായിരുന്നു ഇത്തരത്തില്‍ അനുഭവം ഉണ്ടായത്. ചിത്രത്തിന്റെ പേര് എഴുതിക്കാണിച്ചതു മുതല്‍ തുടര്‍ച്ചയായ കൂവല്‍ ഉണ്ടായതിനു പിന്നില്‍ ഗൂഢാലോചനയുണ്ടെന്നാണ് പരാതി.
