ഗ്രീക്ക് മിത്തോളജിയിലെ പറക്കും കുതിരയാണ് പെഗാസസ്. കൈമേറയെ കൊല്ലാന്‍ സഹായിച്ചതുള്‍പ്പെടെയുള്ള പെഗാസസിന്റെ വീരകഥകള്‍ ധാരാളമുണ്ട്.
എന്നാല്‍ ഇപ്പോള്‍ സകലരുടെയും ഉറക്കം കെടുത്തുന്നത് മറ്റൊരു പെഗാസസ് ആണ്. ഇസ്രയേല്‍ കമ്പനിയായ എന്‍എസ്ഒ നിര്‍മിച്ച മാല്‍വെയറാണ് ഈ പെഗാസസ്.
കേന്ദ്ര മന്ത്രിമാര്‍, പ്രതിപക്ഷ നേതാക്കള്‍, സുപ്രീം കോടതി ജഡ്ജി, മാധ്യമപ്രവര്‍ത്തകര്‍ തുടങ്ങി മുന്നൂറിലേറെപ്പേരുടെ ഫോണ്‍ വിവരങ്ങള്‍ ചോര്‍ത്തിയ പെഗാസസ് അത്ര നിസ്സാരക്കാരനല്ല. േ
ഫാണ്‍ വിവരങ്ങള്‍ ചോര്‍ത്തലുമായി ബന്ധപ്പെട്ട് 2016 മുതല്‍ തന്നെ വിവാദത്തിലായ ഇസ്രയേല്‍ കമ്പനിയാണ് എന്‍എസ്ഒ.
ഇന്റര്‍നെറ്റുമായി ബന്ധിപ്പിക്കപ്പെട്ട ഫോണിലേക്ക് ഇമെയില്‍ വഴിയോ എസ്എംഎസ് വഴിയോ വാട്‌സാപ് വഴിയോ പ്രോഗ്രാം കോഡുകള്‍ കടത്തിവിട്ട് പൂര്‍ണമായി വിവരങ്ങള്‍ ചോര്‍ത്തിയെടുക്കാന്‍ കഴിവുള്ള മാല്‍വെയറാണ് പെഗാസസ്.
മിസ്ഡ്‌കോള്‍ വഴി പോലും മറ്റൊരു ഫോണിനെ ആക്രമിക്കാന്‍ പെഗാസസിന് സാധിക്കും. വിവരങ്ങള്‍ ചോര്‍ത്തേണ്ട ഫോണില്‍ എത്തിയാല്‍ ഉപയോക്താവിന് ഒരു സംശയത്തിനും ഇടനല്‍കാതെ ചോര്‍ത്തല്‍ ആരംഭിക്കും.
ഫോണ്‍ ഹാങ്ങാകാതെ ചോര്‍ത്തല്‍ നടത്തും. ഫോണിലെ എല്ലാ വിവരങ്ങളും മോഷ്ടിക്കുന്നതുള്‍പ്പെടെ ക്യാമറയും സ്പീക്കറും എല്ലാം പെഗാസസിന്റെ നിയന്ത്രണത്തിലായിരിക്കും.
ചോര്‍ത്തലിന് ശേഷം സ്വയം നശിക്കുകയും തെളിവുകള്‍ ഇല്ലാതാക്കുകയും ചെയ്യും. മിസ്ഡ്‌കോളിലൂടെയാണ് മാല്‍വെയര്‍ കടത്തിവിട്ടതെങ്കില്‍ ആ കോളിന്റെ വിവരങ്ങളും ഡിലീറ്റ് ചെയ്യപ്പെടും.
അത്യാധുനിക സുരക്ഷയുണ്ടെന്ന് അവകാശപ്പെടുന്ന ഐ-ഫോണുകളിലെ വിവരങ്ങള്‍ മോഷ്ടിക്കാന്‍ വികസിപ്പിച്ചവയാണ് പെഗാസസ്. ഇന്ന് ആന്‍ഡ്രോയ്ഡ് ഫോണുകളിലേക്കും ഇത് വിജയകരമായി കടത്തിവിടാം.
