ദോശകള്‍ ഇന്ത്യക്കാരുടെ പ്രിയ ഭക്ഷണമാണ്. സോഷ്യല്‍ മീഡിയ വ്യാപകമായതോടെ ലോകത്തെവിടെയുമുള്ള ദോശകള്‍ നമുക്കും പരീക്ഷിക്കാം എന്നായി.
ഇപ്പോള്‍ വൈറലായിരിക്കുന്നത് ‘ഫയര്‍ ദോശ’യാണ്. ഫുഡി ഇന്‍കാര്‍നേറ്റ് എന്ന ഫൂഡ് വ്‌ളോഗിലാണ് തീപ്പൊരി ദോശയുടെ വിഡിയോ എത്തിയത്.
ഇന്‍ഡോറിലാണ് ഈ വെറൈറ്റി ദോശ തയ്യാറാക്കിയിരിക്കുന്നത്. 180 രൂപയാണ് ഒരു ദോശയുടെ വില. പറക്കും ദോശയുടെയും ബാഹുബലി ദോശയുടെയും പിന്‍ഗാമി എന്നാണ് പലരും ഫയര്‍ ദോശയെ വിശേഷിപ്പിക്കുന്നത്.
ദോശ തയ്യാറാക്കുന്നതിന്റെയും വിളമ്പുന്നതിന്റെയും ദൃശ്യങ്ങള്‍ വിഡിയോയില്‍ കാണാം. തവയിലേക്ക് ദോശമാവ് ഒഴിച്ച ശേഷം അതിന് മുകളിലേക്ക് സ്‌പൈസസ്, വെജിറ്റബിള്‍സ്, ചീസ്, കോണ്‍ എന്നിവ നിരത്തും.
ഈ ദോശ തീ കൂട്ടി വെച്ചാണ് ചുട്ടെടുക്കുന്നത്. മസാല നിരത്തി കഴിയുമ്പോള്‍ ടേബിള്‍ ഫാന്‍ തീയുടെ അടുത്തേക്ക് കൊണ്ടുവരും.
ഫാന്‍ കൊണ്ടുവരുന്നതോടെ തീപ്പൊരികള്‍ കൊണ്ടുള്ള കളിയാണ് ഇതിലെ കൗതുക കാഴ്ച്ച. പിന്നീട് ദോശ മടക്കി അതിനു മുകളിലേക്ക് ധാരാളം ചീസ് വിതറും.
എന്നാല്‍, ഇത് ഏറെ അപകടം വരുത്താന്‍ സാധ്യതയുള്ള പ്രകടനമാണെന്നും ചിലര്‍ വിഡിയോ കണ്ട് അഭിപ്രായപ്പെട്ടിട്ടുണ്ട്. നിരവധി പേര്‍ ഈ ദോശ വീഡിയോ പങ്കുവെച്ചിട്ടുണ്ട്.
